越來越多商場商廈被抵押接管，香港又再一輪大洗牌！

　　呢一邊廂，中原CCL呢半年開始回穩，博客身邊都開始有部分人入市自住，二手樓價未必叫「大陽春」、「小陽春」，但都叫回暖；另一邊廂，越來越多商廈、商場，唔係被賤賣都係被人抵押、接管，香港資產正式進入大洗牌時代。

　　每當經濟出現下跌，都係大孖沙執平貨時間。回歸前英資退場、港資上位，回歸後港資部分退場、中資入局，到而家部分中資都開始退場，外資又開始入場，真係一個大循環。

　　據《彭博》引述知情人士透露，施羅德資本和Chelsfield亞洲基金支持的一家公司貸款違約後，銀行債權人正考慮扣押與貸款相關的香港一處購物中心；據了解債權人正考慮為和富商場任命接管人。該商場位於香港北角區，前稱和富薈(Provident Square)。

　　其實呢個商場比較接近砲台山，係城市花園附近，作為港島東居民，博客都唔使問HEBEFACE，好負責任同大家講，呢個絕對唔係死場，但你話旺又唔算係，頂多都係區內民生商場；但你話係咪可以頂15億做抵押品呢？博客就有保留，因為呢個地段呢個位置呢個人流，好難做到貴租，都唔好話佢可唔可以升值，就算齋收租，以15億去計算，回報率有無2厘都係一個問題。

　　不過承接我上面所講，反正錢就借左出去，值唔值15億都要收返。只能夠講，係可見短線的未來，越來越多商場商廈被抵押接管，大地主又再重新洗牌，大家而家呢一刻都係等緊叫胡，個莊係邊個而家都仲未開估，但KEEPER一定是阿爺，這是不會改變的。
　　

《編者按》本欄搜羅即市傳聞，惟消息未經證實，《經濟通》亦不保證內容之準確性。