長和呢單大刁，堪稱一門教科書式商業買賣！

　　今日市場最熱話，相信就係長和(00001)呢單大刁，長和公布，與貝萊德-TiL財團就初步基本條款達成原則性協議，該財團將收購和記港口80%股權，旗下資產包括最近捲入爭議的巴拿馬港口公司股權，代價142.12億美元（折合約1108.54億港元）。

　　留意返，呢單Deal唔包括香港、深圳和南中國營運之港口，或任何在中國內地之港口。

　　今時今日呢個市道，要搵人接手呢個燙手山芋真係十分之難！有時候甚至要拆開賣先得，而家搵到貝萊德財團接貨，小超真係揞住半邊嘴笑。

　　某程度都要多謝侵侵，從美國人角度思考，係軍事戰略上，如果中資控制住南美洲條心臟血管，如果開隻軍艦開入去，真係如入無人之境，直接登陸「美洲灣」（舊稱墨西哥灣）都無咩問題。所以唔難怪侵侵咁大反應，喂！我屋企個門口，原來係條鎖匙係人地到，你都驚啦下話？

　　所以你想拎返條運河咩？可以啊，打包買啦！即係巴拿馬呢舊豬肉、搭埋其他港口豬頭骨一齊賣晒俾你，你想單買條河都唔得囉，呢招「太極式借力打力」堪稱教科書式商業買賣，從政治到商業，都可以開一個章節慢慢講！

　　換個角度睇，其實長和買乜賣乜，都係反映個果個行業嘅衰旺期。之前環球中心一炮過賣出，而家接手個班個個都苦過Dee Dee；如果以同一個思維去睇，運輸業未來應該無咩錢賺，所以小超趁仲有價值嘅時候打包賣出，所以未來幾年運輸業係點，博客就真係覺得前路茫茫。

《編者按》本欄搜羅即市傳聞，惟消息未經證實，《經濟通》亦不保證內容之準確性。