《古臣雙周記－古臣》港股Ｃｈｏｋ爆睇唔透! 穩坐收息股安心搵銀

　　踏入8月再次迎來港股業績期，雖然個市今朝有回彈升得反上26500水平，不過孖屐個勢都係唔太興奮，近日市況都Keep住弱勢。加上呢排成日都有突發消息，中央加強監管連環打擊唔同行業，連阿臣都怕咗咁波動嘅市況。買咩板塊好似都好危險咁。喺呢個情況下，阿臣覺得大家可以用一筆資金部署較穩陣嘅收息股，心定定咁收下息就算。

中國銀行大廈（資料圖片） 

買收息股需備佛系心態 宜關注穩健高息企業

　　要買收息股嘅話，第一件事唔係準備錢，而係準備一個佛系嘅心。記得之前牛市差唔多個個板塊都有得炒，基本上買咩股都會升，好快就可以賺一筆。特別係有炒車股同科技股嘅缸友，當時應該都賺唔少。不過玩收息股嘅話，賺錢方法就好唔一樣，通常都會選一啲穩穩陣陣，唔會點大幅波動嘅股，主要都係靠長坐收下息就算，比較啱一啲唔想冒咁大風險炒股，但又覺得放錢喺銀行唔夠息搵嘅缸友，就好似退休人士等保守投資者，一般都會選擇收息股。

　　要選擇好嘅收息股，孖屐首先會分析以下幾點，包括公司派息高低、派息時間，以及派息時間穩定程度等因素去選出心儀收息股。大家可以用行業去比較派息，又或者參考邊幾間公司喺行業中特別派得多息。多數公用股、內銀股同REITs(房託基金)嘅派息會比其他行業高。

　　同時除咗睇派息，仲要睇埋行業前景、公司背景穩健程度，以及過往股價受市場影響程度，比較之下，當然選擇收益穩健嘅大型公司會較著數。為孖屐所熟知嘅收息股之一就有藍籌股匯控(00005)，以往唔少收息族都鍾意匯控派息夠穩定而部署，所以舊年公司突然宣布暫停派息，就一下子嚇驚咗收息族，導致匯控股價一度隊到落26銀水平，之後先至慢慢升番上嚟。前日(2日)匯控公布中期業績，雖然除稅前利潤要按年跌2%到大約505億，純利按年倒退4%到約394億，不過就恢復派息每股7美仙，雖然派息金額仍然遜市場預期，不過有得派相信對於收息族都已經係一個好好嘅消息！

高息兼穩升股唔怕賺息蝕價 資金少可購港燈 中行

　　講咗應該點樣選擇收息股，其實依加孖屐仲有咩高息股可以部署呢？阿臣就覺得以下幾隻股份大家都可以關注！

　　阿臣認為以公用股收息最為穩陣，睇番上表中電(00002)、港燈(02638)同煤氣(00003)，息率介乎2.6至4厘算可觀，除咗有唔錯派息之外，更重要嘅係三隻股份年內升幅都理想，喺疫情及全球經濟停滯期間，股價都Keep住穩步上揚，其中煤氣今年內已達逾兩成升幅，可見公用股股價同股息皆穩，消除投資者放低「賺息蝕價」嘅憂慮。以上表列公用股入面以港燈息率最佳達4.34厘，雖然年內升幅表現唔夠中電同煤氣咁好，不過現時一手都係大約4000銀左右，入場門檻較低，適合資金較少缸友入場。

　　如果著重更高息率，作為四大國有銀行之一嘅內銀股中行(03988)亦係一個唔錯嘅選擇，中行息率有成8.52厘，領跑其他內銀股，加上中行為國有銀行，有中央政策支持，業務亦相對穩定，年內股價亦錄超過13%增長，入場費約2740元較低，適合資金較少的缸友部署。但要留意，內銀股表現主要受國策及內地經濟表現影響，例如最近有評級機構中誠信國際同聯合資信，就因為不良餘額攀升、區域和客戶集中度高、資產質量存在較大下行壓力，以及撥備計提壓力大等因素，而下調部分國內城商行、農商行嘅中小銀行評級。雖然相信行動對於國有大型銀行唔會有太大影響，但始終都係同業，或者需要多留意消息面對公司所帶來的影響。

 中國銀行日線圖股價走勢。（經濟通HV2系統截圖）

波動市難估升跌 部署中行穩陣收息

　　依加個市太Chok，古臣實行買啲收息股坐下先！依加以2.74銀買入約2萬股中行(03988)先，慢慢坐當收息，希望遲啲慢慢升高！

　　而為咗令缸友跟得貼啲倉位變動，如果阿臣有郁下個倉，會喺《小傳日記》專欄同大家交代聲！想知道古臣百萬倉有咩變動嘅話就記得睇實喇！

【香港好去處】2025去邊最好玩？etnet為你提供全港最齊盛事活動，所有資訊盡在掌握！► 即睇