建行亞洲減定存息，真係仲驚過你！

　　昨日博客寫過，「大貓」出按揭定息計劃，建行亞洲3個月、6個月及12個月港元定存年息一律由2.45厘，分別大減至1.85厘、1.75厘及1.75厘，存額由1萬元至100萬元以下，適用於客戶以新資金辦理。

　　出按揭定息，同時又有高息銀行大減定存利息，博客都講過，樓市係咪轉角，好多時候都係「一葉之秋」嘅東西，其中銀行嘅操作可以睇得出一二，你睇到銀行又出定息PLAN又要減定存利息，你醒目嘅應該早幾日就去入市先係，不論買股定係買樓。

　　博客保守估計，未來三個月定存息率可能回到1.5-1.85呢個水平，其實三大行一早都係呢個水平，建行亞洲已經減慢左，大家都已經「提早」進入減息年代，只係時間問題。

　　9月17日就係美國議息日，美國總統侵侵已經開始「炒人」，解僱聯儲局史上首名黑人女性理事庫克(Lisa Cook)，係咪有牽涉DEI成分就後話，但侵侵呢一舉就係「殺雞儆猴」，邊個唔舉手減息就炒邊個，反正侵侵已經最後一屆做，光腳的不怕穿鞋的。

　　所以來緊呢幾個月樓市股市會點？博客唔講啦，口水都乾，仲怕會跌嘅咁咪繼續鎖堆錢入銀行啦。

《編者按》本欄搜羅即市傳聞，惟消息未經證實，《經濟通》亦不保證內容之準確性。