RSS訂閱 今日恒指又升五百點，主要係受美國吹風減息，似乎好似「鐵一般」的事實咁，然而減息有利內房債務問題，只能夠講遠水不能救近火。
博客昨日上左轉東莞睇家私，順便問下同行朋友內地房地產咩情況，佢用三個字形容：「白菜價。」佢舉例，好似香港人好中意走去惠州買樓，有個盤叫「十里銀攤」，七百幾尺，50萬以內人仔有交易，講緊係現房唔係樓花，簽完約你可以立即拎包入住都無問題個隻。搞到博客都有小小心動，都想話掃返一間做度假屋都唔錯。
因為深圳樓價而家都係企硬，羅湖福田樓價都有成400幾萬，南山去到五六百萬，所以好多後生一代都會走去東莞或者惠州與深圳交界地方買樓，每日就開車通勤，情況就好似住天水圍返港島咁，快嘅話開車九個字就到，但樓價相差幾倍。
事實就係，近幾年整個大灣區樓價都跌得好慘烈，以前都可以叫到百萬人民幣買到七百幾尺，而家40至50萬人仔就有交易，好似碧桂園(02007)都一路係大灣區內起緊樓，因為要KEEP住有TURNOVER先可以有錢還債，但早兩日碧桂園出業績，上半年虧損215億人仔，樓就一直起緊，但毛利下跌。
所以今日內房炒起，都係虛火，內地樓市都仲未起到，一街街白菜都是，其實香港人有興趣，用兩三年人工走去掃一套，先唔好話考慮升值，返去住下都過癮！
《編者按》本欄搜羅即市傳聞，惟消息未經證實，《經濟通》亦不保證內容之準確性。
樂本健獨家優惠：【降醇速】環保裝$199 (原價$310)，只限2天：25/8-26/8/2025，早上10時開搶！即上healthsmart.com.hk► 了解詳情
