「黑神話」又有新作，呢次中國遊戲業估值又推高？

　　嚴格來講，博客都算係一個「骨灰級」機迷，之前都寫過關於《黑神話》點樣係中國乃至外國遊戲界轟動起來，亦都解釋過中國文化點樣透過「遊戲」出圈海外，呢件事本身對中國遊戲業有積極正面作用。

　　就係昨日，《黑神話》原班人馬公司「遊戲科學」，係2025科隆遊戲展開幕之夜正式公布《黑神話》系列第二部作品，當大家以為都係「悟空DLC」之際，點知原來係發表新作，《黑神話：鍾馗》！而家外國玩家瘋狂推高「鍾馗」搜尋量，要玩Game，首先要惡補歷史神話人物！
　
　　其實外國好多大廠已經做過不同神話嘅遊戲，北歐又有、埃及又有、中東又有，但「中國神話」呢個題材庫就一路無乜人做，一來班外國設計師根本唔識，二來中國神話一做錯內容就要推倒重來；有趣嘅係，騰訊(00700)呢十年八年收購好多外國公司，間接將技術帶入中國，識寫UE5引擎嘅中國設計師終於做出高水平作品。

　　另外，「遊戲科學」已經註冊左好多商標，包括：《黑神話：姜子牙》、《黑神話：小倩》、《黑神話：山海》、《黑神話：大荒》以及《黑神話：搜神》。

　　所以，中國神話有海量級題材，只係過往都無人才去做，先浪費係到。大部分機迷對於北歐、埃及神話已經悶晒，所以「遊戲科學」作為一間整3A大作公司，有機會透過呢幾水「黑神話」，間接將中國遊戲業估值推高，同時又可以將中國文化輸出海外。

《編者按》本欄搜羅即市傳聞，惟消息未經證實，《經濟通》亦不保證內容之準確性。