呢期中環多花生殼，呢次到打工仔舉報自己老細！

　　博客成日都係Threads到見到好多花生殼，特別多中環人討論自己部門嘅新鮮事，呢次就到某間中資銀行了。

　　呢次主角叫Toby Yuen，原本就係一間中資銀行做嘢，舊年年尾佢阿頭叫佢幫個客搞條數，不過個玩法就奇奇怪怪，似乎有小小繞過監管、幫客走資嘅嫌疑；Toby就覺得唔對路，拿拿聲向阿頭嘅阿頭、再向HR舉報。你以為銀行會獎勵你咩？錯啦，總之試用期未過就被人炒佢，然後HR仲要恐嚇佢，目的係想佢收聲。

　　不過呢個Toby都唔簡單，佢已經將呢件事燒到去分行、總行，甚至國家金融監督管理總局同中紀委都落場，好笑嘅點係，呢件事係香港發生，但金管局又無份參與咁。

　　聽聞呢個Toby手中好多證據，博客見佢日日都係咁Threads到開Post講，睇來應該背後有一個大炸彈係未拆到；而Toby最後有上載封信，講到銀行內部回覆話成件事已經交咗俾中紀委，而前分行行長洪波，就被停職帶走調查。

　　成件事好似歌利亞戰勝巨人咁，不過亦反映出阿爺近年來嚴格打擊走資，都似乎好似無乜用咁，原來咁大間中資銀行都幫緊內地客走資，相信好快阿爺就會出手，再次整頓呢堆香港嘅中資銀行，哈！又有戲睇啦。　　

《編者按》本欄搜羅即市傳聞，惟消息未經證實，《經濟通》亦不保證內容之準確性。