東莞銀行係中環正式開場，唔知有無莞式服務？

　　呢兩日係中環圈講得最多，就係一間紅底白字LOGO、寫住「東莞銀行」正式係中環落腳，是否很驚訝？講不出說話。皆因呢間東莞銀行，博客真係識嘢少，返深圳都未見過；而東莞最美好嘅年代，博客都經歷唔到，因此都未見過呢間「東莞銀行」，所以結論係：「真牙人妒忌假牙人，聞所未聞。」

　　呢次開戶仲有「高息」吸客，所謂「10厘七日最多做一萬」，咁呢個「高息」最後你有幾多落袋呢？博客督過下機，無錯，係$19.4，連一個兩餸飯都買唔到，真係多謝晒。

　　有趣嘅係，原本佢租呢個舖位，棟大廈叫「中銀集團人壽保險大廈」，但而家佢又改名叫「東莞銀行大廈」，咁大支嘢？

　　其實東莞銀行想落地香港，唔係呢兩年嘅事，早係2022年個陣東莞銀行已經向金管局申請牌照，人地一早已經鋪路落香港搵食。

　　至於點搵？香港而家銀行零售都仲有需求，特別而家地產商廈大洗牌，你間銀行要撥壞帳，我個間無喔，所以應該都係想為中資機構服務，至於落得香港就應該係「國家級任務」。

　　博客上網搵過資料，東莞銀行其實係內地深交所搞IPO搞足17年都批唔到，呢水落香港又拎牌又開銀行又租鋪，搞咁多想做乜，大家都明啦。

《編者按》本欄搜羅即市傳聞，惟消息未經證實，《經濟通》亦不保證內容之準確性。