補鑊$4000嚟喇！Click入嚟教你點填份申請表

　　大家翹首以待嘅派$4000終於嚟啦！由上年份《預算案》等到今年個份都嚟緊，終於今日開始大家可以喺呢個網址 css.gov.hk 下載申請表格，或者去學生資助處或職津處到拎表填喇！不過！都仲係要等到2月1日先有得交表，最快嗰批都要去到4月先有得拎。唉，Jenny都預咗要等政府做嘢，係咁上下㗎喇！

　　Jenny今日都嗱嗱聲Download份表嚟望望先！第一部分就係填個人資料；第二部分就係確認返你係屬於邊一類嘅申請人；第三部分就係簽署聲明喇。就咁睇唔難填，不過都有啲伏位要留意㗎！首先填完表唔等於就有得拎，申請人要提供埋身份證、住址和銀行帳戶證明副本；第二就係如果有啲人有聯名物業，差餉單可能只係得其中一個人嘅名，但都一樣要喺第二部分申報返，如果唔係被查到就當你漏報，可能影響你個申請㗎喇！另外就係拎錢要有本地銀行帳戶，如果冇嘅，就要等申請批出之後，親自上去在職家庭津貼辦事處，或學生資助處到拎支票先得喇！

 （「關愛共享計劃」申請表格）

　　不過想喺政府手上拎足$4000？都要過五關斬六將㗎！Jenny就幫大家搵埋呢「六將」出嚟，大家睇吓自己過唔過到佢哋嗰關啦！

1.　年滿18歲；

2.　持香港身份證（包括新來港人士，但不包括來港工作、求學或接受培訓的香港非永久性居民及其受養人，也不包括以訪客身分來港的人士）；

3.　通常居住在香港（包括暫時離開香港而在合理預期情況下會返回香港居住的人士，例如因出差、留學或求醫而離港的香港居民，但不包括已移居海外的人士）；

4.　沒有受惠於2018至2019年度《財政預算案》就綜合社會保障援助、長者生活津貼、高齡津貼或傷殘津貼發放的額外兩個月款項；

5.　無須繳交2017/18年度課稅年度的薪俸稅；

6.　在香港沒有物業。

　　如果你喺第1－3關任何一關過唔到，就等於Game Over（冇份拎）；但如果係第4－6關有涉獵到，就會被「扣血」（扣去本身喺《預算案》中嘅寬免額），拎唔足呢$4000喇！

　　另外，呢份申請表係要用投遞或郵寄嘅方式遞交嘅，如果貼唔夠郵票就可能會石沉大海！不過Jenny就覺得，其實而家都2019年喇，乜嘢都話電子化，政府又已經整咗個創科局出嚟，何解到而家交申請表都仲要用書面形式咁唔環保又Old School呢？