蔡思貝睇足2場騷儼如女主人 胡鴻鈞冧爆默認關係匪淺

　　【晴報專訊】胡鴻鈞（Hubert）一連兩場演唱會前晚圓滿結束，人緣甚廣的他，吸引不少圈中好友前來捧場，唯獨與他傳不和的許廷鏗未見蹤影。至於近日盛傳遭陳自瑤「封殺」的蔡思貝，則懶理捲入是非，連續兩晚以「女友」身份現身撐Hubert，更睇到激動落淚，難怪令Hubert冧爆︰「我哋非常之『好朋友』。」

　　Hubert與蔡思貝的緋聞傳得鬧哄哄，蔡思貝曾被踢爆借用Hubert胞姊胡嘉雯的名貴跑車代步，今年農曆新年時她又跟Hubert到親友家拜年，儼如一家人。Hubert上周五在九展舉行入行後首次個唱《The Day After演唱會》，思貝帶同父母低調捧場；有指思貝看到台上的Hubert爆喊時，她亦感動得喊埋一份，足見關係匪淺。有思貝現身捧場，Hubert自然十分賣力，成功操出八嚿腹肌的他，身穿高衩短裙襯魚網絲襪，在台上展示苦練已久的舞技，令粉絲看得熱血沸騰。

胡鴻鈞爆肌兼露點示人，令粉絲為之瘋狂。

炎明熹首任個唱嘉賓以及與男歌手合唱，笑言將兩個「第一次」給了胡鴻鈞。

未敢有親密舉動

一班捧場的藝人前晚走入後台與胡鴻鈞合照，唯獨不見避開方力申的陳瀅。

　　前晚Hubert舉行演唱會尾場，獲大批圈中好友現身支持，包括何雁詩夫婦、王君馨、羅天宇及吳業坤等，另一對緋聞男女方力申和陳瀅亦難得同場，不過陳瀅看到小方竟然「走夾唔唞」，即時轉身避合照，令小方尷尬非常。思貝前晚再次現身捧場，頭戴鴨舌帽的她被傳媒認出時表現愕然，後來才大方坐定定影相；睇騷期間，她不停用手機拍下Hubert的英姿，猶如小粉絲般興奮。完騷後，思貝與一眾嘉賓走入後台與Hubert影大合照，Hubert熱情地與來賓攬到實，唯獨與思貝合照時，只紳士式搭膊頭影相，明顯有忌諱。

風騷談雙方見家長

胡鴻鈞紳士式攬住思貝影合照，未敢與對方親密擁抱。

　　Hubert事後受訪，對於思貝連續兩晚入場支持，Hubert透露思貝曾擔心要開工，所以婉拒他送出門票，結果思貝自己真金白銀買飛支持。提到思貝帶父母睇騷，Hubert表示︰「我知道佢父母都鍾意睇演唱會，希望佢哋睇完個騷都鍾意睇我，我父母都有嚟睇。」豈不是雙方齊齊見家長？Hubert一臉風騷說︰「隔住幾十人千里迢迢咁見面呀？」說到思貝在頭場時看到Hubert爆喊時，亦一同落淚，Hubert稱現場很多人感動落淚，令他覺得窩心；對於思貝睇足兩場猶如女主人，Hubert冧爆說︰「我哋非常之『好朋友』。」關係盡在不言中。