《Online有話兒》巴郡股東會：股神不滿SPAC如賭錢，芒格話比特幣令人作嘔

　　一年一度嘅巴郡（美：BRK）股東會喺美國時間１號舉行，今次股神巴菲特就拍住芒格、非保險業務副董事長Greg Abel同保險業務副董事長Ajit Jain齊齊現身加州。不過股神仍然毫不吝嗇咁答股東問題，當然仲有唔少金句啦。

蘋果公司沽早咗，公司估值要同利率比

（shutterstock圖片）

　　巴郡自2016年新建倉買入蘋果公司（美：AAPL）後，往後幾年連續增持，去到上年第三季開始減持，連同第四季總共減持咗9316萬股蘋果。睇番當時蘋果公司交易嘅均價係96美金至97美金左右，依家已經升到130美金樓上。巴郡似乎係沽早左，巴菲特就認衰：

「呢個可能係錯誤嘅決定。」

　　佢話蘋果嘅管理層非常好，雖然庫克創意上可能比不上喬布斯，但佢係自己見過最好嘅公司管理者。巴郡仲揸住5.3%蘋果股份，持股率喺安全水平。佢唔認為蘋果嘅估值瘋狂（現時市盈率約29﹒4倍、市帳率31﹒7倍），話估值係要同利率比較，當美國國債息率長期維持低水平，股票價格則顯得低，而且冇咩債券可以有好似蘋果、Google咁嘅盈利水平。

股神一派信奉價值投資，巴菲特：比特幣不與置評

（shutterstock圖片）

　　依家加密貨幣熱炒，巴菲特同芒格對於相關議題嘅態度有啲異常，巴菲特話，自己同芒格都冇揸比特幣，所以唔想答為免令人唔開心喎。

　　芒格直情話：「比特幣令人作嘔。」佢痛恨比特幣嘅成功，唔鐘意一樣憑空創造嘅金融產品就賺幾十億美金，亦唔鐘意虛擬貨幣綁架現有嘅貨幣系統喎。

　　事實上，絕大多數投資者都知股神一派所信奉嘅係價值投資，意即投資喺現價低過內在價值嘅企業，目的係追求較固定嘅投資回報。依家根本冇人評估到比特幣嘅價值，甚至好似芒格咁講，只係一樣憑空創造嘅金融產品。

SPAC如賭錢，大戶劏散戶

　　特殊目的收購公司（SPAC）容許公司借現金殼上市，最近已經頻頻傳出美國證交會落實加強監管SPAC，包括修訂會計指引，慎防過熱。SPAC按規定兩年內必須做併購，巴菲特認為咁做同賭錢冇分別，呢種繁榮可能唔持續得幾耐。芒格就話，SPAC係easy money，用嚟賭博係種羞恥行為。

　　香港方面，港交所（00388）一早放風話要喺今年之內完成首單SPAC上市，有傳證監會對應否引入SPAC存疑，有業界人士認為最終落實機會低， 香港投資者睇嚟要放長雙眼啦。

撰文：吳藹林