【Online有話兒】索尼派7個月花紅咁開心？皆因PS5依然一機難求！

　　個個都話經濟差，唔通真係個個都覺得經濟差咩，最起碼索尼（Sony）唔係先啦！據日媒報道，索尼計劃向日本員工大派7個月花紅，嘩！因乜解究索尼咁大手筆獎勵員工呢？原來因為到目前PlayStation5都係一機難求，刺激索尼遊戲業務迎來最好一年，筆者到今日都依然抽唔到機，真係抵索尼發到豬頭咁。

（Shutterstock圖片)

純利達百億美元，PS5出貨量達450萬部

　　大家都知道，索尼過往都係靠影音業務起家，想當初大家都要有部「Sony Walkman」先可以叫做「潮人」，到後來索尼進軍遊戲機市場，第一部「PlayStation」遊戲機已經將對手SEGA打低。發展至今，公司係去年發行第五代PlayStaion，已經造成一機難求局面，筆者到今日抽籤多輪都依然未抽到，你就知道幾咁架勢堂啦！

　　據日本媒體報道，市場預計索尼年終純利可能會創紀錄達百億元美元，主要由於肺疫大流行期間好多人留在家中，對娛樂需求增加。而據索尼今年2月時發表嘅財報顯示，從11月至12月尾期間，PS5出貨量為450萬部，而且遊戲及網絡服務全年營收達250億美元，將會係索尼遊戲業務史上最好嘅一年！唔怪得索尼向員工大派七個月花紅，而且係日本職場文化中，獎金通常都係一年排兩次，唔知下一次會唔會又咁豐厚呢？

索尼遊戲有幾誇張？2020年力壓騰訊稱霸遊戲界

（Shutterstock圖片)

　　究竟索尼遊戲業務有機誇呢？係去年因為疫情下，「宅經濟」概念大爆發，有關於室內嘅娛樂業務都賺到Fat Fat，有外媒統計過，去年10大最賺錢嘅遊戲公司入面，風靡少女們嘅《集合啦！動物森友會》以及Switch嘅製作發行商任天堂僅僅排第三，收入達121億美元；而第二嘅就係騰訊啦！食胡位既係靠旗下手遊《王者榮耀》，以及手握Riot Games、Epic Games、暴雪等等股權。

　　而排第一就梗係非索尼莫屬，先唔好計算遊戲機賣得幾好，單單純遊戲收入就達250億美元，係騰訊一倍之多！受消息影響，索尼股價近年都已經翻倍，由去年3月約每股6430日圓，升至近期12000日圓，照呢個勢頭，股價可能有機會重返高位都唔出奇！

索尼幕後功臣：吉田憲一郎

（Shutterstock圖片)

　　網友成日都話「索尼大法好」，咁幕後功臣又係邊個呢？上一任CEO「平井一夫」係2018年退任後，就由原本CFO吉田憲一郎頂上，成為公司新任總裁。而吉田憲一郎帶領公司走出虧損，包括出售個人電腦 VAIO 業務、調整電視業務，當時唔少分析師已經睇好吉田憲一郎上任，對佢有高度評價！

　　當年平井一夫都有評論過吉田憲一郎：

　　「吉田憲一郎作為CFO，一直都支援著我嘅工作，係一位重要夥伴，同時都係一位可貴的朋友，我相信佢有深刻嘅戰略思維，以及堅定嘅決心去完成集團嘅目標。」

　　睇嚟吉田憲一郎係咁多人心目中都係有讚無彈，但可唔可以快啲整多啲PS5俾機迷？真係望穿秋水啦！

撰文：李皆穎