《Online有話兒》巴菲特公開信：永遠唔好沽空美國，債券唔啱玩

　　隨住巴郡（BRK﹒A）公布公司年報，股神巴菲特都發表咗一年一度嘅致股東公開信，呢封信一向來被華爾街人視為必讀，而巴菲特今年就講咗一啲有關收購同債劵市場嘅睇法。

（shutterstock圖片）

　　舊年美國深受新型肺炎打擊，經濟係二戰以嚟最差。巴郡嘅董事長兼首席執行官巴菲特冇提及依家嘅爭議性議題，例如政治同疫情咁，淨係話喺美國建國嘅短短232年，仲未出現另一個好似美國咁，可以釋放人類潜能嘅地方。雖然受到嚴重阻礙，但美國經濟上年有驚人進展，我哋可以堅信：

「永遠唔好沽空美國。」                

　　佢更提到，喺美國有好多成功故事，嗰啲有理想、有抱負，但只有微薄資本嘅人，通過創造新嘢或者用舊嘢改善顧客體驗，得到超乎預期嘅成功。似乎想鼓舞下美國人咁喎。

股神認衰高價接貨，PCC有98億美金資產減值

（shutterstock圖片）

　　事實上，舊年巴郡業績表現唔係咁好，全年賺425﹒21億美金，按年跌47﹒7％，不過單指第四季純利係358﹒35億美金升22﹒8％。巴菲特喺公開信度花咗好大篇幅講喺2016年斥資321億美金收購嘅飛機同工業零件製造商Precision Castparts Corp.（PCC），因為上年航空業同飛機零件嘅需求下降，呢間公司搞到巴郡盤數有成98億美金資產減值。

　　股神認衰，話PCC嘅表現令人失望，而自己對佢嘅盈利潛力過於樂觀。佢喺判斷PCC未來嘅平均收益上出錯，所以錯誤咁計算咗合理嘅收購價。

　　佢仲講多咗少少關於收購嘅心得，話大多數優質嘅企業都唔想賣畀人，所以想併購嘅公司多數只會搵到啲缺乏持久競爭優勢嘅標的，同時要付出驚人嘅控制權溢價。佢哋可能會用令估值變高嘅財技，用資產換資產。

　　「呢啲帳面上嘅虛幻可以持續好耐。但最終會發現好多商業皇帝係冇著衫，記者、分析師同投資銀行家最初將呢啲企業家譽為天才，但最終都係去咗垃圾桶。」

　　巴菲特上年嘅致股東公開信就講過收購似結婚，有時會鬼揞眼。佢依然認為PCC未來喺淨有形資產上獲得良好嘅的回報，希望佢呢單deal最終會修成正果啦。

收益率低冇肉食，要逃離債劵市場

　　近排債息急漲，巴菲特就話近40年嚟息率持續下降，甚至喺一啲發達國家，例如德國同日本嘅主權債，投資收益率係負，債券投資面臨黯淡嘅未來。而投資垃圾債亦唔係解決低利率嘅辦法，30年前一度強大嘅儲蓄同貸款行業自我滅亡，部分原因就係因為投資垃圾債。

　　想知道多啲巴菲特對投資市場嘅睇法今年巴郡嘅年度股東大會喺當地時間5月1號下午1點半以直播形式舉行，記得mark實啦！

撰文：吳藹林