《Online有話兒》美國總統交接在即，究竟可唔可以順利完成？

 　　 美國總統交接儀式係1月20日進行，不過交接之前已經好多「花生」，唔少網友都關注交接期間會唔會發生大單嘢，因為有右翼組織已經持槍周街行，表示對於拜登就職相當不滿，究竟美國係咪真係咁嚴峻呢？

（Shutterstock圖片)

右翼反政府組織Boogaloo示威，拎長槍周圍行

（Shutterstock圖片)

　　自美國民主黨奪取參眾兩院控制權後，民間反對聲浪不絕，就係就職典禮前呢幾日，繼右翼反政府組織Boogaloo幾個禮拜前發起係50個州示威活動後，噚日（17日）早上係華盛頓國會大廈附近，警方再搜捕一名男子持有37發未登記子彈、3個高容量彈匣及一把Glock手槍。

　　就算係紅色猶他州、俄亥俄州等，都有Boogaloo成員展示半自動步槍。由於目前美國情況嚴峻，曼哈頓有240間Starbucks因應示威而關閉；FBI、國土安全部和國家反恐中心已經發表公告指，經過之前國會暴動一事，預計極端分子會將「大選舞弊」當成極端主義嘅催化劑。

拜登上台後取消特朗普行政命令，擺明拆台？

（Shutterstock圖片)

　　正當拜登預備上台之際，白宮幕僚長提名人選克萊恩已經同大家預早公布，拜登上台後會簽署多項行政命令，包括取消侵侵（特朗普）時期多項爭議性措施，其中包括重新加入《巴黎氣候協定》、撤銷對多個穆斯林國家入境或移民禁令、強制民眾係跨州出行期間以及進入聯邦建築物時必須配戴口罩等規條，擺明想拆共和黨台啦！

　　不過拜登上台後，中美關係會唔會有緩和趨勢呢？中國社會科學院美國研究所副所長袁征就預計，短期內可能有降溫情況，因為拜登作風相對溫和，但因為中國仍然係被美國視為最大競爭對手，所以中美關係也「回不到過去」，如果兩國關係處理不好，中美不確定性增加，不排除發生戰爭的可能性。

伊萬卡代「侵」從軍，計劃參選議員之路

 （Shutterstock圖片)

　　不過侵侵會唔會咁容易放棄呢？唔少人估計都已經係強弩之末，雖然未能確定會唔會再度參選，不過據指佢嘅大女伊萬卡（Ivanka Trump）已經鋪緊路，預備參選佛羅里達州參議員席位，同共和黨（Marco Rubio）打對台咁話，不過自己人打自己，會唔會被黨內人士批評呢？

　　其實伊萬卡早幾年已經野心勃勃，四年前已經搬到去華盛頓，外界估計係想為自己政治生涯鋪路，去年聖誕又去到邁阿密北部向居民派發食物，希望爭取到當地市民支持，有指佛羅里達州係侵侵粉絲重地，可能部分「侵粉」可以過戶落大女到，真係天下父母都係一樣咁為兒女！

撰文：李皆穎