【回顧2020年】失業？減薪？放無薪假？2020有失，亦有得！

　　2020年最後一日，今年係好特別嘅一年，香港嘅經濟環境並唔樂觀。慶幸Marketing呢一行，相對之下未算係最差嘅行業，裁員、減薪、無薪假等情況對比其他行業為少。據非正式統計，大約有10-20%嘅marketer失業，30%左右嘅marketer已經被減薪／放無薪假。疫情下大多打工仔都好努力去爭取工作機會、保住飯碗，但辛勞同時，呢一整年就有一份重重、患得患失之感。

「做多咗campaign，但九成九似係白做」

「2月訂咗30盒口罩，最終4月先得1盒到手」

「全年合計買咗近20盒口罩，但其實只係用咗6-7盒」

「好似仲保住份工，不過公司過埋新年就應該裁員」

「雖然冇得去旅行，但係都儲唔夠錢買樓」

「身邊多咗人結婚，不過去少咗婚禮」

「放咗30日AL，然而全部都係無薪假」

「雖然有一半時間WFH，但仲忙過之前」

　　好忙好努力，不過並唔實在，患得患失嘅感覺，令每個人都帶點情緒病。

　　其實今年要回顧嘅事情，並唔係我哋失去咗幾多，或者仲擁有幾多，而係喺困境中我哋可以得到幾多。疫情奪走咗我哋好多嘢，如呼吸嘅自由、旅行嘅機會、正常嘅節慶，呢啲都係冇得改變嘅事實，但我哋必須學懂從困境中得到一點得著。人生係一個漫長嘅旅程，工作雖然重要，但未必一定要不停地向前跑，去到某啲關口，從另一個角度看的話，其實係好好嘅休息站，加油後再上路。

「雖然冇咗份工，但可以做返自己，多咗時間學一門手藝」

「雖然放咗30日無薪假，但多咗時間陪家人」

「雖然冇得去旅行，但發掘多咗香港好去處」

「雖然年頭訂口罩不停被cut 單，但令你變成咗衛生專家」

「雖然有15盒口罩用唔哂，但學懂於艱難時同人分享」

　　2021年相信係更難嘅一年，但記緊喺過難關嘅同時，亦要留意自己同身邊人嘅情緒。千萬唔好「保住份工，但多咗個病」，金錢重要，心理質素更重要。喺疫情下能夠保持心態嘅人，佢哋喺疫情後「自我報復性反彈」嘅能力必定比別人高。

　　加油。