阿爺未必想財金人才當特首

　　今年立法會選舉選唔到，套用財經術語，「市場無焦點」之下，自自然然有人就會去搵啲焦點畀大家聚下焦。近日有媒體就大字標題，指前金管局總裁陳德霖正喺度磨拳擦掌，著手籌組競選特首辦公室，仲搵咗一位「金融界猛人」坐鎮做「大內總管」，部署未來一年多嘅競選策略，劍指下一屆特首寶座。

　　新聞就講到似層層咁，不過其他媒體好快就已經引述熟悉陳嘅消息人士話，呢個傳聞當真係「子虛烏有」，最到位嘅一句回應係：「即使有心選特首，都不會在此時此刻成立競選辦」。

　　熟知政治運作嘅應該都知道，特首選舉仲有年半先舉行，的而且確，有心想競逐特首嘅人選，只要求其問一問本地政圈任何一人，都唔會蠢到叫佢依家就話成立競選辦，咁早嘅階段，「朝中有人好辦事」，好應該係先打好同阿爺嘅關係，等有人幫手喺中南海講好說話。至於競選辦公室，真係去到臨尾先落實都未遲，所以陳德霖「去馬」呢篇報道，水份真係相當重。

　　不過水份重又唔代表陳德霖係唔想選，好有可能佢真係想出選，但暫時只係流於有咁嘅概念，仲未去到「實行」階段。由上年開始一直都係傳佢好有興趣咁睇，好明顯陳德霖應該係有心之人，今次再咁樣傳佢連競選辦都搞埋，極可能都係畀同樣有興趣問鼎特首之位嘅人跣一鑊，不過陳出選嘅最大問題，在於阿爺會唔會想搵一個前財金官員去領導香港？

　　有政圈中人就指出，陳德霖嘅能力唔需要懷疑，但今時今日嘅香港，已經唔單單係一個國際金融中心咁簡單，係可以左右全球最大兩個國家點樣布局嘅一枚棋子，試問特首呢個位又點能夠只係處理金融問題呢？所以政圈中人相信，阿爺呢個時刻點都係傾向搵一個能夠擔負政治重任嘅人，遠遠多過搞好香港金融經濟嘅人。