【拒絕社畜命運】無人有權對「欺壓」沉默！打工仔5步應對職場霸凌

TEXT:Yan LawPHOTO:網上圖片

20/06/2019

　　早前有打工仔喺網上討論區「投訴」，話自己發高燒請病假，點知就畀同事、經理「單打」，佢更發現原來有同事暗地裏一直篤佢背脊，最終佢忍無可忍，決定辭職唔撈！

　　其實好多打工仔返工志在搵兩餐，日日準時放工絕對係佢哋嘅最大目標。偏偏人在職場身不由己，就算「你不找辦公室政治，辦公室政治也會找上你」，所以唔少打工仔為咗保住自己個飯碗，只好被迫跟隨某些不合理嘅職場文化，甚至忍受不同程度嘅職場欺凌，因而令自己陷入情緒困擾。

（截圖自《辦公室》）

　　如果你從未經歷過職場欺凌，那小編要恭喜你了！皆因曾有調查發現，每三個打工仔中，就有一個曾經歷職場欺凌，其中包含以言語、非言語、身體、心理上的虐待或羞辱。以下是辦公室內最常見的5種欺凌行為：

1. 嘲諷／辱罵：「你邊間大學畢業？連最基本嘅概念都搞不清楚，都唔知點解會請你返嚟！」、「話你兩句覺得好委屈呀？而家啲年輕人真係好玻璃心，做得咁唔高興嘅話咪辭職囉。」

2. 刻意吹毛求疵

3. 打壓及否定工作表現

（截圖自《愛．回家之開心速遞》）

4. 給予超負荷的工作量

5. 夥同其他同事一起孤立被霸凌者

　　其實職場欺凌並唔係罕見嘅事，咁點解大多數人都未必察覺得到呢？究其原因，係因為被欺凌嘅人大多抱著「多一事不如少一事」嘅態度，選擇啞忍，甚至說服自己所謂「欺凌」只係同事間開嘅玩笑，期望有一日會出現轉機。直到有一日真係再忍唔到落去，就會選擇離職。

下頁看　5步解決職場欺凌

（截圖自《愛．回家之開心速遞》）

　　面對職場欺凌嘅時候，大家應該要點處理？

1. 承認自己受到傷害

　　好多被欺凌者都會認為，一定係因為自己做得唔夠好先會被人針對、排斥，所以往往會滋生出覺得丟臉、難堪、有罪惡感等情緒，結果選擇默不作聲，甚至唔承認自己受到欺凌。但其實承認自己被傷害，並唔係一件醜事，更加代表已踏出解決問題嘅第一步。

2. 客觀診斷被欺凌的原因

　　所謂「空穴來風必有因」，所以第二步要做嘅就係，了解自己點解會成為被欺淩嘅對象。到底係因為自己做錯事得罪人，定係別人對自己有誤會？搵到原因之後，不妨同對方三口六面講清楚，如果真係自己做錯咗，一定要真誠道歉。但如果成件事根本係對方無理取鬧，咁就要勇敢企出嚟發聲，保護自己！記得喺呢個「診斷」過程中要保持客觀，亦可搵身邊其他同事一齊分析，避免自己喺負面情緒嘅影響下，對對方作出過分指控，或者苛責自己。

3. 以有建設性的方法正面對抗

　　對付欺凌者，有時唔一定要同佢辯駁，因為佢通常歪理連連，而且句句人身攻擊，一般嚟講你係好難拗得贏佢。所以呢個時候，最好就係用佢嘅說話嚟幽佢一默！就好似以下例子咁……

當欺凌者試圖嘲諷你嘅時候：「乜你啲字寫得咁醜樣！唉，連自己個名都寫唔清楚，都唔知你小學係點畢業？」

你可以答佢：「喔，其實我小學係有畢業。我今次啲字會寫返好睇啲。」

又或者當欺凌者咁講嘅時候：「你唔識睇我眉頭眼額？要搵我幫手都睇下我咩心情先，而家唔好嘈我住！」

你可以答佢：「我啱啱有睇到你嘅臉色，看到你而家有啲黑面，所以我諗我都係返埋位做嘢先。」

　　點解咁講會有用？因為當欺凌者聽到自己嘅用語時，佢先會感受到語言暴力對人所造成嘅傷害；而且欺凌者最無法辯駁嘅就係佢自己嘅用語，你用佢嘅用語，就能夠有效咁制止他。