2018年圖書館借閱排名出爐！香港人鍾意XX書唔出奇

　　大家最近睇嘅一本書係咩書呢？Jenny身為知識份子，手袋入面梗係要袋住一本細細本嘅小說，閒來無事揭兩頁，增加一下文學修養嘛！不過，聽聞而家好多人都已經唔睇書只睇手機，Too bad！

金庸、亦舒著作不朽

　　而呢排立法會就開緊特別財會討論緊《財政預算案》，問到民政事務局嘅時候，就有一條係關於公共圖書館嘅借閱量嘅查詢。Jenny睇返局方列咗個表，即刻同大家開心Share先！

　　喺上年10月逝世嘅文學泰斗金庸先生，佢嘅作品《射鵰英雄傳》連續三年登上「成人中文小說類書籍」榜首，有過萬人借閱，而佢另外4部作品亦都榜上有名。而著名香港小說及散文女作家亦舒，亦都同金庸先生平分秋色，都有5本作品上榜。換言之二人已經稱霸今年嘅排行榜了。

香港人究竟有幾愛日本

　　至於成人中文非小說類書籍方面，Jenny記得上年十大入面有九本都係旅遊書，仲有一本就係DSE嘅中文科Past Paper，只能夠感嘆一句，香港人真係「去旅行，去到盡」！

　　點知去到今年，連Past Paper都唔見埋，榜上全部都係閃令令嘅旅遊書！而且十本入面有九本都係講日本，剩低一本就係澳洲……睇嚟香港人唔只係去旅行，直情係「去日本，去到盡！」，難怪啲網民成日都話日本先係自己鄉下喇！