新「煲呔曾」？「煲呔」同薯片叔叔仲可以合作？

　　有「薯片叔叔」、「鬍鬚曾」之稱嘅前財政司司長曾俊華，自從選特首落選之後搞作多多。Jenny今日就收到風，佢準備同「煲呔」合作噃！唔通「雙曾」再度合體嘅日子指日可待？

此「Bowtie」不是彼「煲呔」

　　非也非也！雖然薯片叔叔同「煲呔」真係合作，不過係同一間叫「Bowtie」嘅公司，唔係「煲呔曾」吖！是咁的，呢間「Bowtie保泰」係間虛擬保險公司，佢哋噚日（1日）就公布，委任薯片叔叔出任資深顧問，主要係提供策略諮詢、研究利用保險科技，為香港社會帶來正面影響喎！雖則預咗「顧問」呢個位就多數係觀賞性用途為主，但Jenny都不得不讚下呢間公司嘅PR，諗到會搵「鬍鬚曾」嚟做「煲呔曾」係幾醒！事關除左可以霸到財經版版面，仲可以霸到政治版版面！

「真．煲呔曾」要抖抖

　　至於何解「Bowtie」唔搵「真．煲呔曾」嚟做生招牌呢？應該係因為曾生牽涉過錢銀上嘅瓜葛，呢排又啱啱放返出嚟，都係畀人抖下先喇！所以整返個「煲呔曾2.0」都不無道理吖！