郭炳江今出冊 派定早餐俾記者好識做

　　之前因為涉賄賂前政務司司長許仕仁而被判入獄5年嘅新地前聯席主席郭炳江，一代商界巨頭變階下囚，今日終於服刑期滿。佢一對子女同埋細佬郭炳聯，齊齊晨咁早就去到赤柱監獄出面接佢，不過郭太梁潔芹就未有現身，Jenny估佢應該係留喺屋企打理一切等老公返喇！

即使久未面對鏡頭，郭生似乎未有生疏，冇話太緊張。

郭氏姊弟攬攬爸爸好肉緊

　　郭基煇（Adam）事先張揚Daddy會見傳媒，所以接郭生出獄嘅仲有成4、50名記者同攝影師。大戶人家果然唔同啲，未夠7點已經有PR姐姐到場打點，之後仲向行家們大派麵包同埋紙包飲品，Jenny覺得好貼心吖！不過如果有埋奶茶飲就更好喇！

早起的記者有早餐食！

　　郭家三人今朝9點左右就到咗赤柱，去到大約9點半左右，郭炳江終於出現，阿女郭曉妍（Noelle）即刻衝上去攬實爸爸，阿仔Adam都緊隨其後，最尾就係細佬郭炳聯。正所謂生囡夠貼心，Jenny見郭生攬得最實就係Noelle喇！

重獲自由 開心到訓唔著

　　郭炳江隨即就見記者，話出獄好興奮，噚晚仲開心到訓唔著添！不過佢第一個要多謝嘅唔係屋企人，而係主耶穌喎。佢話自己喺獄中好辛苦，好多時好氣餒、有時好擔心、有時好自疚，有唔同感覺，但神都支持自己。佢仲勸籲青年人要守法，否則入獄後就會好後悔！

　　被問到一出獄最想做乜，郭炳江諗都唔諗就話「返屋企！」亦都話訂咗食點心添！佢一對仔女就同爹哋講有蛋撻、咖啡，仲有菠蘿包。不過郭炳江聽到菠蘿包就「不了」，自爆自己減緊肥。但係照計入面伙食咁差，郭生你已經瘦咗好多啦喎！

郭生會買iPhone定華為？

　　話晒之前都係聯席主席，咁出冊之後會唔會返公司呢？郭生就話「唔會喇！」仲好感嘆咁話，離開咗公司4年已經有好多變化，而家就想去唔同國家，學吓人哋好嘅嘢，同埋睇吓最新嘅科技有咩變化，點樣用喺業務上咁。

　　咁又係嘅，喺入面幾年，iPhone都換咗幾代喇！梗係搵人班返部最新版本嘅手機返嚟用下先喇，不過唔知佢會選擇iPhone定響應支持國貨買華為呢？