青年宿舍等了又等 青年都等到變中年喇！

　　話說4年前一個風和日麗嘅晏晝，「四叔」李兆基話要捐塊地出嚟，畀政府起青年宿舍，點知幾年嚟都冇消息，大家都就快唔記得之時，直到近排卒之有返啲聲氣，今日下午終於佢呢塊地舉行動土儀式喇，名叫「保良局李兆基青年綠洲」。

曾蔭權時代產物 

　　其實青年宿舍呢壇嘢，由曾蔭權時代講到梁振英任期都完埋，前年終於見到第一幢青年宿舍……動工喇！就係香港青年協會喺大埔興建嘅宿位，之不過得80個㗎咋！預計就喺今年落成。會唔會好似沙中線咁延期就未知，不過得80個位，攝牙罅都唔夠，起好都未必輪到你住。

　　而今日動土嘅「青年綠洲」就好啲，可以提供1680個宿位，包括816間約160平方呎嘅單人房、432間約215平方呎嘅雙人房。由保良局營運，租金以會係市值租金一半，即係單人房大約2000蚊租、雙人房就大約3、4000蚊租！首次租期至少2年，滿咗兩年之後係可續約嘅，最多可以租5年。

首先你要……

　　想申請？首先你要年齡介乎18至30歲，Jenny收到消息話入息要低於兩萬蚊，仲有好重要嘅一樣要求，就係申請嘅話要放棄輪候公屋㗎！至於用咩形式去分配？Sorry！小妹仲未收到風。

　　Jenny好記得，「青年宿舍」呢個諗法，係前特首曾蔭權喺2011年提出，當時Jenny有啲朋友都心郁郁想去申請，點知一等就等咗8年幾9年，到而家連起都未起好，Jenny位朋友都已經由青年變成中年啦！睇嚟佢都要唱返句：「從來無我份～～～」先得喇！