生B撞正《國歌法》首讀 容海恩囡囡個名要有「昌」？

　　BB來了！新民黨副主席（恩恩豬）自從結婚同懷孕以來，一直都係傳媒嘅焦點，話晒佢係立法會第一個喺任內結婚兼生B嘅議員喎！本來佢嘅預產期就係今年農曆新年年初一，不過之前恩恩豬就驚到時冇醫生得閒接生，就揀咗今日開刀噃！

B女有成3KG重 幸福盡在不言中

　　恩恩豬平安誕女之後，就即刻同傳媒分享佢哋一家三口嘅相喇！容海恩就話，生產過程順利，B女重3公斤，仲話好快會帶BB同大家見面添！Jenny見到恩恩豬雖然啱啱生完，但係個樣仲係咁容光煥發，好精神咁噃！希望恩恩豬仲記得同Jenny嘅「豬腳薑之約」啦，好期待啊！

師傅葉劉好Happy 上唔上契仲未知

　　恩恩豬嘅師傅葉劉都喺Facebook恭喜徒弟嘅弄瓦之喜。佢同Jenny講，聽日就會去醫院探恩恩豬同BB，同埋覺得好開心，因為新民黨喜訊連連，不斷有人添丁、桃花運旺盛，至於會唔會同BB上契，葉劉就話要睇袁氏夫婦願唔願意先得嘅！而改名方面都冇乜提唔提議嘅，都係等BB嘅爸爸媽媽諗喇！

個名要有個「昌」字 今次考起大律師

　　不過，葉劉就同Jenny透露，BB爸爸袁彌昌嗰邊嘅族譜就排到個「昌」字，所以應該都係叫「袁昌X」㗎啦！不過Jenny就覺得，對於女仔嚟講，呢個字嘅剛陽味似乎有啲重噃－－睇嚟都幾考爸媽腦筋。

　　Jenny就估，下個月尾就係新一份《財政預算案》出爐，恩恩豬揀呢排開刀，相信都係想坐完月就返嚟開會喇！之但係，今日其實係《國歌法》條例草案交上立法會首讀嘅大日子，恩恩豬遲唔揀早唔揀，揀正今日嚟生B，唔理《國歌法》，「阿爺」會唔會嬲嬲豬㗎？嗱！母女平安係開心事，「阿爺」唔會咁計較啩？