10月2日宜參選？基哥為啖氣，何必呢！

　　今日可謂跑死政治Beat嘅行家喇！事關三大盛傳／公開講明會參加九龍西補選嘅人士，今日都有新動作喇！Jenny雖然唔太熟曆法，但都感覺到今日一定係好日啦！如果唔係，點會齊齊揀中今日宣布人生大事，係咪先！

　　三人當中，取態最明朗嘅就係民主派劉小麗，佢神咁早已經話要出來選，仲要喺提名期第一日就報名，驚選舉主任又玩最後一日先講D唔DQ喎！所以今日佢就嗱嗱聲去報名先！佢身後仲有成班泛民撐場，就咪話唔墟冚喇！

轉身射個三分波 基哥出山話要選

　　而盛傳咗好耐會出嚟同小麗「死過」嘅前食衛局政助陳凱欣（阿欣），今日亦終於肯講自己參選喇！不過今日撐佢場嘅就只有民建聯嘅鄭泳舜、前老細兼食衛局前局長高永文，同埋佢啲新知舊雨，睇嚟阿欣今次係打溫情牌，亦都唔想同太多建制派掛勾，影響佢所稱嘅「獨立」形象喇！不過點都好，各位行家企喺烈日之下，最想聽到嘅都係你一句「宣布參選」啫！唔使再日日旁敲側擊對大家都好吖！

　　九西今次兩女對戰可以話係係人都知，不過前民協馮檢基（基哥）似乎不甘寂寞，之前先講完如果小麗被政府取消參選資格（DQ）先會參選，轉身射個三分波今日就報名喇！

「落水」好難唔畀人串

　　Jenny同行家們好想睇下基哥如何解畫！原因竟然係：有民主派人士喺佢考慮參選已經係咁抨擊佢，仲話有啲係「謀殺佢人格」添！所以佢要快快趣參選，因為一參選咗，嗰啲發布失實言論嘅人就有刑事責任喎！之但係，說好的「小麗優先」呢？基哥就話呢樣係「冇變過」，但係佢唔可以再忍受多十幾日嘅指罵，所以要報咗名先！即係為啖氣？基哥雖話「唔係」，但大家都心照啦。

　　基哥仲話，如果小麗喺提名期結束前獲確認資格，佢就會退選；如果之後先獲確認，自己就唔會進行選舉工程，但幫唔幫到小麗就唔到佢可以控制喇！先唔講基哥嘅誠信仲存唔存在，呢句「唔到佢控制」都幾有意味，小麗今次睇嚟凍過水喇！