陳柏宇台上分享甜蜜生活

　　【晴報專訊】陳柏宇（Jason）前晚Boxing Day完成一連三場演唱會，難得在台上與粉絲互動，當然少不了大談生命中兩個重要女人——女兒Abigail和太太符曉薇（Leanne），一家三口甜到漏！

Jason開完騷翌日要為朋友擔任兄弟，相當忙碌。

　　Jason在演唱會上分享與Leanne嗌交後怎樣氹她︰「佢比較善良，我就比較有道理，不過雙方好嬲時，道理已經拋出窗外。等到佢冷靜落嚟，我第一樣做嘅就係講對唔住。」Jason解釋每次都主動道歉，是希望太太將來與朋友鬧交時能先說對不起，免得因小事失去友誼。演唱會上亦播出女兒Abigail萌照，Jason一邊望著大銀幕的照片一邊笑著唱歌。他自爆第一場完騷後回家，立刻抱起女兒又錫太太︰「如果我先錫個女，太太就會呷醋。」

　　演唱會尾聲，Jason唱出《後排慶功宴》，他坦言出道時唱很多慘情歌，事隔幾年，覺得在這方面的唱功沒多大進步，他說︰「你哋都知我依家生活好開心，開心嘅歌係唱畀太太同個女。」

囡囡開始增磅

陳柏宇太太符曉薇昨日在IG貼出一家三口後台合照。

　　完騷後Jason接受訪問，透露太太同女兒都有到場︰「好興奮，但我都掛住唱唔記得佢哋。」談到太太曾擔心Abigail唔肯飲奶搞到瘦晒，Jason稱女兒現有十磅。最後他說明年暫定不會開騷，若有小型音樂會則考慮唱幾場。