民記聖誕趴象哥因乜事嬲豬 劉國勳化身「幣少」成功搶Fo?

「又到聖誕～又到聖誕～」其實聖誕節仲有一個星期先到，不過民建聯（民記）今日就已經搞定個聖誕Party邀請傳媒參加啦！梗係啦，因為立法會都準備放聖誕假啦嘛！而立法會大會上個星期都已經開咗聖誕前嘅最後一個會，相信唔少議員都Plan好埋聖誕行程喇！

象哥一講完呢句，Jenny同附近行家都忍唔住笑咗!

象哥輸咗嬲嬲豬？

今年民記Party都係同上年玩返差唔多嘅嘢，「大電視」就走唔甩，今年仲加多咗一個新Game──「超級無敵兵乓波」（咪又係來自獎門人……）！唔玩又至可，一玩先發現原來唔少民記議員都唔識打乒乓波！就好似黃定光（象哥）同蔣麗芸（Ann姐）咁，要民記啲「少壯派」解釋先明白少少。結果象哥嗰隊輸咗，佢就扮細路嬲嬲豬咁話：「都唔好玩嘅！」但係明明頭先玩得最High大聲就係你同Ann姐噃……

劉國勳化身「幣少」玩「置入式行銷」

　　民記貴為吸金力最高政黨，大抽獎就當然唔少得！Jenny印象中上年啲獎品就五花八門乜都有，本來小妹仲期待今年有華為手機抽，可惜係冇嘅!但就反而多咗現金券，都好!有夠實際!

你睇!劉國勳似乎對紙巾咁受歡迎好滿意，個表情彷彿寫住:「很想要吧!」

　　不過，點都唔夠劉國勳實際同人人有份！佢今年似乎緊貼某電視台玩法來個「置入式行銷」sell下自己，趁抽完獎就大派佢新Design嘅紙巾，仲要係乾、濕兩款都有！個個行家都爭住拎，就好似前日「幣少」派錢咁款呀！結果成個大抽獎就被佢搶晒Focus喇！好彩聖誕節係普天同慶嘅日子，如果唔係黨友們畀你咁搶Fo法，可能會普天同「㷫」，咁就唔好啦！