白鴿黨「八年一遇」退黨潮 林卓廷係始作俑者？

　　Jenny近排就收到風，民主黨又爆退黨潮喇！聽講今次仲要係關現任立法會議員林卓廷（阿廷）事噃！

　　是咁的，新界東嗰邊有唔少地區椿腳，都係由十年前「前綫」合併入民主黨得嚟嘅，例如劉慧卿（卿姐）、鄭則文、區鎮樺同柯耀林等等。不過自從阿廷入咗民主黨新界東支部之後，雖然有卿姐力撐，但係就同部分「前綫」派嘅人唔多「啱牙」，成日都有啲小摩擦發生。

疑安插親信惹反彈

　　而幾個月前，有傳阿廷想安插佢老友莊榮輝喺下年區選出戰西貢都善選區，結果「將軍澳民主關注組」成員李栢棠撞到正；而民主黨又因為通過咗視關注組為「參政組織」，所以唔准黨員同時擔任關注組成員，令到身兼地區組織「將軍澳民生關注組」主席嘅柯耀林或者因為咁要退黨。

　　而唔少十年前由「前綫」過檔去民主黨嘅人，見咁款都打算一齊退，其中沙田區議員丁仕元已經認咗會退，而大埔區議員區鎮樺就話未有最後決定。不過最重要嘅係，佢哋兩個同時都指出，考慮退黨係因為同阿廷合作唔到！

阿廷呻冤枉：「大家作風都唔同」

　　阿廷被點名，Jenny梗係要問問當事人點睇啦！阿廷就同Jenny申冤，其實自己同唔少「前綫」嘅人都合作得唔錯㗎！好似鄭則文、吳錦雄等。不過提到區鎮樺同丁仕元個名，阿廷就承認「同佢哋冇咁熟」、「大家作風都唔同」，至於關注組一事都唔係佢決定，係中委會同埋選委會決定咁話喎。

　　今日有傳媒就話今次退黨潮會有10人退出，更有其他行家話收到風多達50人「退黨保平安」添！問阿廷知唔知有幾多人退黨？有咩人會退？阿廷就耍手擰頭。連連話「唔知呀」、「你問返佢地啦」，不過佢都話，相信當中會有啲「幽靈」會員，即係只會喺黨員大會時投票、冇乜點參與黨務嘅人都會退黨。

每八年爆一爆 「咖喱飯」係最成功個案

　　其實民主黨都唔係第一次爆退黨潮喇，而且仲係每八年就有一次，分別喺2002年同埋2010年。對上一次2010年嗰陣，范國威（咖喱飯）率領約30人齊退黨，咖喱飯仲另組新政黨「新民主同盟」添，後來成功「上位」晉身立法會議員！成為退黨後出路嘅最佳Case Study！

　　唔通白鴿黨真係逃離唔到「八年一退」呢個魔咒？唔知去到2026年會點呢？不過，計Jenny話到時民主派過到選舉主任嗰關，仲有得參選先算啦！係咪先？