港鐵國泰「難兄難弟」 市民信心冇咗難返嚟！

　　今日港鐵又又又壞喇！不過對於Jenny嚟講，港鐵故障已經唔再係新聞，邊個星期冇壞過先係新聞！所以一見今日觀塘線同將軍澳線又故障，就算佢已經喺7點維修好咗，但信心失去咗就係失去咗！

「一星期一壞」頂唔頂得住「暴力兔」

　　Jenny印象中，以前港鐵都係「一月一壞」，豈料而家已經進化到「一星期一壞」。上星期就因為有職員發現訊號系統冇反應，要轉人手操控，搞到半個香港都停頓咗，到而家都未講到個實際原因出嚟；今次港鐵就快咗啦，同大家講今次係信號系統組件故障，更換後可回復正常運作，強調返同上星期嘅四線故障情況唔同，咁上星期「打柴」個原因到底是……？

　　嗱！下個星期仲有隻「玉兔」有機會打到嚟，唔知港鐵又有冇做好準備呢？小妹聽聞呢隻「玉兔」已經被台灣嗰邊稱為「暴力兔」，佢嘅中心附近風力今朝已經錄得有成240公里，天文台預計呢隻兔仔喺呢兩日仲會升到260公里，而之前打過嚟香港嘅超強颱風「山竹」，佢中心附近最高持續風速都係250公里，即係話仲勁過「山竹」！雖然而家預計正面襲港嘅機率係一成，但係風呢家嘢就最飄忽㗎啦，如果打到嚟，港鐵仲頂唔頂得順㗎？

國泰令940萬人被「剝光豬」

　　講時講，交通股真係流年不利，陸上嘅港鐵就一鑊甘過一鑊，Keep住頭痕，天上就有國泰「玩鋪勁」，一次過洩露940萬名乘客資料，包括姓名、國籍、出生日期、電話號碼、電郵及實際地址、護照號碼、身份證號碼、信用卡號碼、飛行常客計劃會員號碼、顧客服務備註同過往飛行記錄資料，等如940萬人齊齊畀人「剝光豬」一樣，你話唔嬲就假!

　　Jenny一直都好支持呢間以港為家嘅航空公司，係出Trip首選，可惜佢真係愈做愈差，簡直同港鐵可以話係「難兄難弟」！小妹仲聽聞國泰早在3月已經發現服務器有可疑，最後搞到5月先確認資料外洩，10月先公布畀市民知！咁大間公司，小小網絡保安都唔捨得花錢做好啲，只識炒期油，仲要炒燶，結果令其他營運成本要左Cut右Cut，Cut埋IT部門人手，將網絡保安外判，終於咪搞出個大頭佛囉！今勻呢隻鑊睇嚟就點都冇得外判喇！