山竹來襲！林鄭都要出嚟提大家做好防風措施！

　　號稱最強颱風嘅「山竹」今個星期日（16日）嚟啦！如無意外，綜合咁多年嚟嘅資料，「山竹」會係歷來襲港最強風暴！

「山竹」隨時「碌」得快過高鐵

　　呢舊「山竹」有幾勁，呢幾日各大傳媒都喺咁煲緊，仲話佢勁過港人同澳人嘅惡夢「溫黛」同「天鴿」！睇返資料，原來當年造成過百人死亡嘅「溫黛」，掛八號時中心附近風速係時速185公里，最接近香港嘅時候，強度係時速167公里；「天鴿」最接近香港嘅時候，都有185公里。而今次呢舊「山竹」，天文台截至今日下午兩點嘅中心附近風速係240公里，Jenny記起之前傳媒試搭高鐵時，錄得最高時速係201公里，難怪有網民笑仲「快過高鐵」喇！

貼「米」字型較安全

　　「山竹」佢聽日就會係菲律賓掠過，威力應該會減弱少少，不過都可能有200公里。雖然香港人差唔多年年都會遇上唔同颱風，早就見慣見熟。呢兩日都有好多市民喺玻璃窗上黐返個大交叉、買定成個星期嘅餸擺喺屋企。Jenny聽講，貼「米」字型就比較安全，可以減低爆玻璃嘅機會，就算爆咗都唔會碎到成地都係。

　　不過今次個風咁堅，今日中午嗰陣，特首林鄭都要特登出嚟同大家講要做好防風措施，同埋各部門要隨時Stand By吖！林鄭仲特登勸大家喺風暴期間最好都係留在室內，千祈唔好去觀浪、衝浪、睇大潮之類，除了對自己有危險之外，仲會對拯救部門造成壓力！Jenny就覺得，大家除咗唔好麻煩到消防員之外，亦都盡量自己煮，唔好難為一眾外賣仔喇！仲可以健康啲添！