100蚊1個飯盒你食過未？

　　作為打工仔，有邊個未捱過飯盒；不過Jenny就相信，唔係個個都食過100蚊嘅飯盒喇！霞姨！！畀個解釋嚟好喎！

每日預3000個飯盒

　　是咁的，今日有報紙就報道，雖然高鐵今個月23號就開通，不過港鐵仲未傾好高鐵西九龍站入面嘅內地口岸區人員嘅膳食安排，因為區內嘅消防安全問題，所以冇得整返個Canteen，有估計港鐵要幫700個內地人員「買飯盒」，每日預3000個，每年要使成億添！

　　雖然Jenny唔多明點解700人每日要預3000個飯盒，不過比起呢個，大家計計條數，就會發現每個飯盒就要100蚊！究竟食乜要成100蚊嘅呢？Jenny都好想試下呀！

內地埋單唔駛騰！

　　至於港鐵，佢哋就承認正就呢件事招緊標，仲話呢項服務係應內地要求嘅安排，目的係為內地人員「提供新鮮食物，確保能適時送抵及在進食時保持熱度。」不過，大家放心！港鐵話佢哋只係幫手招標，如果內地派駐機構接受招標結果，所須費用都係內地自己畀返嘅啫！不過要使成舊水去「保持熱度」，唔講仲以為高鐵係起喺沙頭角，而唔係香港嘅市中心西九龍……

　　不過計Jenny話，既然政府都講由香港去福田都只係需要14分鐘，其實大家放飯嗰時搭程順風車返深圳食咪仲化算！仲可以順便買埋杯喜茶返嚟添！錢邊個出都好，最緊要用得其所吖嘛！