高鐵通車喇！帆哥讚營運協議政府有So

講咗好耐嘅高鐵通車終有定案！下月23號通車，唔駛公布一早就通晒天，經過埋星期二行會拍板之後，今日運房局同港鐵就出嚟同大家交代高鐵嘅營運安排喇！

一覺醒來就到天子腳下

　　運房局一哥陳帆(帆哥)今日睇嚟就心情靚靚，一如以往同大家力sell高鐵very good呀、人人都搭賺錢多!Jenny就比較關心車飛幾錢先?以人民幣折合港幣計，由西九去福田，大概78蚊；去深圳北呢，就貴少少收86蚊，去到廣州南的話，大約250蚊到啦。長途車方面，上北京盛惠1239大元，9個鐘到;去上海平啲，1159蚊可埋單，8個零鐘就到步。小妹一睇，個價同搭飛機差唔多，時間就咁睇係長咗啲，帆哥就話有通宵車，等大家一覺醒來就落車!

　　政府及九鐵與港鐵簽署10年的高鐵營運協議，預計通車初期，每日平均載客量大約8萬人次。咦?!明明上年仲估有10﹒9萬人次，無啦啦縮咗水?帆哥就解釋，而家個乘客估算係「好保守」，但係高鐵個財政狀況預測都係好健康，而且通車咗就會有多啲人嚟搭。

帆哥拍心口:分攤方法好「划算」

　　Jenny 睇返個協議，原來一旦實際客量同估算客量相差15％以內，港鐵會全包返啲利潤或者虧蝕，但係去到相差15％以上嘅話，政府就會分攤七成收益或風險，港鐵只需分攤三成就得喇！帆哥拍晒心口話，因為估乘客量會up、up、up，所以政府覺得呢個分攤方法好「划算」！

　　不過話晒香港人揼咗咁多錢去起呢條高鐵，大家最關心嘅就梗係錢嘅問題喇！傳媒對回本期係幾耐，都充滿疑問，但係台上各位就好似借咗聾耳陳隻耳咁......既然高鐵嘅財政狀況好健康、之後仲會愈來愈多人搭，下次記者再問，帆哥不妨畀個肯定少少嘅答案畀我哋吖!咁大家咪唔夠膽再話高鐵係大白象工程囉！

劉天成化身旅遊大使

　　至於今日MVP可以話係港鐵車務總監劉天成喇！佢出嚟原來係緩和下嚴肅嘅氣氛，一路介紹同大家開心Share高鐵沿線有咩靚風景同埋美食，乜乜牛初乳、乜乜粟米同乳鴿係「光明城三寶」、又同大家講吓「惠州係我家鄉嚟㗎」，Jenny聽聽下仲以為自己聽緊國家旅遊局嘅介紹會添！