民主派又內訌？林鄭有得推銷順便助埋攻

　　呢排吹到行一行嘅空置稅「風」，不同黨派都梗要派員出嚟講一講、搶一搶版位啦！而Jenny最有印象嘅就係公民黨已經爭取咗呢個空置稅一段時間，而家啲風吹得咁行，更加要加多幾錢肉緊啦！但係呢個空置稅問題就疑似又令民主派內訌喇！

公民黨喺空置稅嘅具體建議記者會上面，明言唔認同阿涂所指嘅「整色整水」。

阿涂批空置稅整色整水

　　今日適逢係立法會行政長官質詢時間，有啲議員都追問呢個問題。今日搶到第一個發問嘅就係涂謹申（阿涂），就話林鄭成日話房屋問題係重中之重，但係上咗任成年淨係搞咗個土地供應專責小組，啲嘢仲要做到「天女散花」咁款，又「整色整水」搞一手樓空置稅，質疑林鄭係唔係「贏就林鄭月娥，輸就黃遠輝（土地供應專責小組主席）」先？

　　唔知係唔因為天氣唔好，林鄭聽完問題後全程黑面，仲叫阿涂唔好講「風涼話」，話之前自己做咗啲好事，但因為冇諮詢就畀人鬧，而家咪做返諮詢囉！林鄭之後答有關空置稅嘅問題時，都搬返阿涂嗰句「整色整水」出嚟鞭屍，連一直爭取緊空置稅嘅公民黨郭榮鏗都話，雖然平時好尊重阿涂，但係呢個位就真係唔係好認同喇！

林鄭睇準機會抽水

　　聽到呢句，林鄭似乎心裡都暗爽一下，仲講咗句意味深長嘅說話：「睇嚟呢個議題，即使係政見相同嘅議員都會有唔同嘅看法。」

　　而公民黨喺完咗質詢時間之後，亦都搞咗個記者會，同傳媒講返有關空置稅嘅具體建議，仲重申返唔認同阿涂所指嘅「整色整水」。不過Jenny記得，阿涂其實都唔係反對搞空置稅，仲就住空置稅向政府提過書面質詢添！何解今日又批評係「整色整水」？搞到被林鄭追擊之餘，連隊友都要劃清界線......

搞完一輪 原來係一場誤會?

　　Jenny喺Lunch Time就撞到阿涂，細問之下先知，原來佢嘅意思並唔係話反對搞空置稅，只係覺得空置稅都只係好有限度咁釋放單位，應該叫政府收回土地嗰啲，先可以大幅度咁解決到房屋問題，林鄭唔去做呢啲，淨係肯做空置稅，咪覺得佢「整色整水」，唔係實質想解決問題囉！原來係咁！搞到人哋以為民主派成日都內訌，下次傾好先出嚟講呀嘛！