區諾軒「煲冬瓜」 考起梁君彥定難為翻譯員

　　今時今日做立法會議員，識中英文已是基本，適逢立法會今日都恢復審議「一地兩檢」嘅二讀，日後仲要迎合大灣區嘅國策叫大家北上發展，梗係要識「煲冬瓜」（普通話）先係王道！係咪先？

　　嗱！根據議事規則，議員喺立法會發言，係可以用普通話、廣東話或者英文，以前都有唔少議員喺辯論時表演過「煲冬瓜」。今日就輪到議會新丁區諾軒（區軒）就嚟個示範，用有少少港式口音嘅普通話動議休會待續，以辯論港鐵沙中線紅磡站擴建地盤爆出鋼筋涉造假事件。平心而論，以香港人嘅標準嚟講，佢都算係講得幾好㗎啦！

區軒晒「煲冬瓜」原來係想考考主席Listening。

考考主席「煲冬瓜」

　　不過，點解佢無啦啦要用普通話動議？區軒就話，原來有好多建制派都話主席聽唔明普通話，今次就想測試吓主席梁君彥聽唔聽得明喎！

　　咁區軒呢個Test又成唔成功呢？主席就直認自己啲普通話唔係好好，但強調都聽得明區軒講咩嘅！不過當葉劉提議叫區軒繼續以普通話解釋點解提呢個動議，主席就一口拒絕，仲話「你（區諾軒）唔好難為我哋啲翻譯員」。究竟係難為了翻譯員，定係難為了主席，真相就只有天知、地知、主席知喇！

原來區軒普通話有「二級甲等」

　　區軒就同Jenny講，其實佢都唔知主席係唔係真係聽得明，定係睇咗佢份講稿所以「聽」得明，不過佢亦都透露，原來佢都有考過普通話水平測試，仲拎到「二級甲等」嘅成績，Jenny睇返個評分準則，「二級甲等」即係「聲韻調發音基本標準，語調自然，表達流暢；少數難點音（平翹舌音、前後鼻尾音、邊鼻音等）有時出現失誤；詞匯、語法極少有誤」。雖然區軒被人問到有啲怕醜咁款，係咁話「自己啲語言能力其實都係嘛嘛咋」，但計Jenny話，對比澳門特首崔先生的話，簡直係超班添喇！