你覆核時我又覆核？ JR鬧劇終告一段落

　　上回講到王國興（MC興）協助的士司機從業員總會（的總）秘書長黃大海司法覆核（JR）區諾軒個參選資格；泛民一方就有「長洲覆核王」郭卓堅（堅叔）JR民建聯鄭泳舜。堅叔個申請率先畀人打回頭，今日黃大海個JR都畀高院駁回咗，齊齊冇得玩，Jenny都要學「獎門人」講返句：「Super！打和！」

齊齊冇得玩「Super！打和！」

周官不許大海覆核

　　黃大海早前向高院提司法覆核，話區諾軒自2016年起多次喺公開場合推動港獨、提倡自決，並且焚燒《基本法》，認為佢違反選舉聲明同確認書，所以要求撤銷區嘅議員資格。

　　法官周家明噚日聽完各方陳詞之後，今朝頒下書面裁決……登、櫈！黃大海嘅申請正式被駁回！周官仲話黃生嘅申請唔明智，無足夠理據支持，認為黃生嘅最終目的係挑戰區嘅議員資格同埋選舉主任嘅決定，而呢個範疇已觸及《立法會條例》61條，合適程序應該係提選舉呈請，所以唔批佢個司法覆核許可，仲判佢要支付埋區諾軒同政府一方嘅訟費。

區諾軒串爆MC興

　　區諾軒今次「逃過一劫」梗係要出返句聲反撃，呼籲建制派唔好再用司法制度申訴一啲瑣碎無必要嘅嘢，仲引用埋佢補選時對手陳家珮個口號，叫MC興「回歸理性」，更忍唔住都要串一串MC興，「賠上咗天價午餐肉、相當大嘅代價」。嘩！串到應一應呀！

　　之不過，周官講到其實可以提選舉呈請，唔知阿黃生湊唔湊得齊10個港島區選民支持提交選舉呈請書呢？定今次之後就鳴金收兵？咁又要聽下回分解喇！但據Jenny記億所及，每次選舉呈請都要等兩、三年，到時今屆立會任期都完結喇！