林鄭的少女時代　係活躍義工嚟㗎

　　近排好多大學都啱啱舉行完畢業典禮，相信各位畢業生都收到畢業證書啦！特首作為各間大學嘅當然校監，林鄭月娥今年首次喺大學嘅畢業證書上簽名！Jenny一於問師妹借張證書來睇睇先，見到林鄭就喺上面簽咗「Carrie Lam」呢個英文名，除咗呢個版本，Jenny仲有幸因為採訪關係，拎到佢簽喺競選宣傳品上面嘅中文版簽名添！大家唔使羨慕我㗎！

月娥的少女時代。

 浸大雷Sir同林鄭識於微時

　　今日Jenny喺Facebook到見到另一版本嘅「月娥簽名」噃！小妹一向都係成日上電視嘅「浸大雷Sir」雷雄德嘅小粉絲，今日見佢Post咗張中學時代「那些年」同其他學校學生做義工時嘅簽名卡。Jenny細睇之下，竟然發現當今特首林鄭月娥少女時代嘅簽名，係冇個「林」字㗎！見到此Post，Jenny都即刻搵雷Sir求證，到底此「月娥」是否彼「月娥」呢？

　　雷Sir好快就同Jenny確認咗「月娥」嘅身份，仲話當年林鄭同佢一樣，都係有參加社會服務團，係義工服務嘅活躍分子，所以大家就認識咗。就喺中四嗰年，雷Sir母校香港鄧鏡波書院社會服務團獲政府青年實踐計劃撥款，喺灣仔石水渠街舉辦遊戲街小畫廊活動。活動完結之後，佢地就同隔籬女校即林鄭母校嘅義工交換簽名，其中一個就係少女林鄭喇。

簽「郑月娥」因快夾妥

　　小妹發現，點解當時嘅月娥係簽簡體字「郑月娥」嘅？雷Sir話係因為當年覺得寫簡體字既方便又快捷，冇咩特別嘅！等Jenny仲以為林鄭細細個已經咁有遠見，識得同內地接軌添！

　　Jenny都記得林鄭之前講過，細個嘅志願係做社工，所以佢喺中學時熱衷做義工都十分正路。雷Sir仲話當年，經常同隔籬女校St. Francis一齊做義工，同林鄭可謂識於微時，記得林鄭每每做事都非常落力用心，圈子入面幾有名，那些年大家都係好Pure好True 咁希望可以盡綿力服務社會，所以友誼都特別純潔。

　　其實Jenny都想拎張相同大家開心Share，不過雷Sir就話呢啲都係「朋友限定」，加上上面仲有其他同學仔嘅簽名，所以Jenny都係尊重返雷Sir嘅意願，就唔貼張相出嚟啦！大家只好幻想下喇……