高醫生老是常出現 何解舜仔獨得其歡心？

　　政府啲高官多數退咗落嚟都好得閒，有啲會教吓書、遊吓埠、做義工，又或者做返老本行咁，而Jenny就發現前食物及衞生局局長高永文（高醫生）就特別啲，竟然鍾意去助選噃！

(設計圖片)

兩會「請假」都要嚟！

　　話說今個星期日（11日）就立法會補選嘅大日子，各個候選人就梗係馬不停蹄咁周圍宣傳喇！淨係造勢大會都唔知搞咗幾多次！Jenny就除咗見到咁多位候選人嘅師傅、黨友之外，仲有一位人兄係「老是常出現」，佢就係高醫生喇！

　　噚日Jenny喺建築、測量都市規劃及園境界候選人謝偉銓嘅造勢大會度見到高醫生嘅身影，突然醒起高醫生似乎已經幫勻晒咁多位建制候選人造勢，例如1月尾就去咗香港仔幫陳家珮（Judy）、２月中就去咗大圍搵鄧家彪（阿Bill），不過都唔夠九龍西嘅鄭泳舜（舜仔）威威豬！事關Jenny有印象高醫生早係上年10月開始，就同舜仔齊齊落區、食豆腐花、「陪跑」等等，噚日作為政協「新丁」嘅高醫生明明兩會都特登「請假」喺回港幫舜仔造勢，仲講明3月11日投票日會再「請假」，為嘅就係投舜仔一票添！係愛呀！舜仔！記得要攬攬高醫生喇！

舜仔深得歡心全因三個字

　　只不過，明明咁多位候選人，點解就係得舜仔獲高醫生如此厚愛呢？相信各位讀者同Jenny一樣都十分好奇箇中緣由喇！原來係因為三個字：「架巳冷」（自己友）！因為高醫生本身係潮州人，而舜仔老竇鄭錦鐘就係九龍西潮人聯會創會會長。咦，大家都係同鄉喎！高醫生就梗係要照住「世侄」，差唔多全程跟出跟入，連本身自己做咗政協要上京開會，都特登飛返嚟同舜仔造勢！搞到Jenny都不禁諗，唔通佢係順便、係咁倚出席謝偉銓嗰邊嘅造勢大會？所以張官方大合照見唔到高醫生個大頭？

　　香港島候選人還有區諾軒、伍廸希和任亮憲；九龍西候選人還有姚松炎和蔡東洲；新界東候選人還有黃成智、方國珊、陳玉娥、趙佩玉和范國威；建築、測量、都市規劃及園境界候選人還有司馬文。