補選近了 大主席對新同事的寄望是......

　　雖然已經去到年十四，不過經民聯今日都繼續喺立法會搞新春茶敘，大主席梁君彥都有份出席㗎！話說今日財務委員會有個開到8點特別會議，表決修改會議程序，搞到啲議員茶敘中途都要落返去會議室撳掣投票，當時林健鋒（Jeffrey）啱啱好興致勃勃咁同小妹講緊下個月嘅大灣區考察團將會去邊度參觀，但係遇着響投票鐘，就唯有下回分解！

雖然已經去到年十四，不過經民聯今日都繼續喺立法會搞新春茶敘呀！

「乖乖地、聽教聽話！」

　　至於貴為大主席嘅梁君彥就冇份投票喇！佢就唯有留喺5樓同大家一齊睇住會議直播，仲同大家預測「應該5點就搞掂！」結果所有修正案同動議真係喺5點04分完成，大主席果然係大主席，世事都被你看透了！

正在等待黨員回來的大主席。

　　言談間大家亦都傾到補選將近，唔知大主席對幾位新同事有咩寄望呢？點知大主席第一個反應就係「希望以後嘅新同事乖乖地、聽教聽話！」小妹同其他行家聽到都即時笑咗出聲，唔知係唔係大家都同時間諗起，特首林鄭噚日喺禮賓府新春酒會，重提返佢12年前駐倫敦時嘅嗰份「我都有狗那份忠誠」嘅講稿呢？不過，主席!議員職責是監察政府，有時太聽教聽話並唔係好事來啊!