怕戀情「見光死」 容海恩聞袁彌昌即封口

　　呢排Jenny密密去唔同議員搞嘅新春茶聚、飯局，真係食到有啲滯，人都肥幾磅！睇嚟新年過後都要努力減磅Keep Fit先得！而今日就輪到新民黨嘅容海恩(Eunice)搞茶聚，不過就係High-Tea形式，飲吓茶食件Cake，Light好多囉！Eunice真係深明我哋呢啲Lady嘅心情喇！

你睇！Eunice個懷春少女樣~

　　搞得新春茶聚，Eunice雖然未婚，但都好識做派吓利是！喂！近排你同黨友袁彌昌嘅「戀事」傳到沸沸揚揚，幾時派兩封利是先？Eunice就一於封口、只笑唔答喇！之但係小妹聽講，有師傅話佢今年嘅戀情會「見光死」噃！Eunice又擔唔擔心先？

我信愛，同樣信會失去愛……

　　Eunice就自爆自己一直有同一位「特定」嘅閨密（唔通係講過話會幫佢做掩護嘅麥美娟？）齊齊去過算命，仲玩埋塔羅牌添！佢就話自己都唔係好信呢啲嘢，覺得啲師傅都係捉人心理，氹人先講咗自己啲嘢出嚟，就順住個勢講返啲啱聽嘅說話咁啫！

　　Eunice呢頭話唔驚，但係每當講到戀情嘅時候，佢就即變懷春少女咁扭扭擰擰，拉去講啲似是而非嘅嘢。言談間有行家膽粗粗咁響埋男方全朵，問Eunice對佢點睇、有冇咩不滿先？Eunice嘅即時反應就話：「冇咩感覺喎」！咳咳！Eunice你係對袁生「本人」冇咩感覺呀？定係「情人眼裡出西施」，唔多覺有不滿呀？講完呢句，Eunice又即刻封口喇！嗱！佢師傅就「唔嫁又嫁」入行會，佢就「唔講又講」，果然係兩師徒噃！其實有拖拍係開心事又怕咩講呢？

Eunice同袁彌昌合照就得呢張咁大把，仲有個電燈膽響度添！想知電燈膽係邊個?去Eunice fb睇啦!(設計圖片)