利敏貞「鳳袍」一衣成名 老細邱騰華讚有Sense？！

　　噚晚Jenny個Facebook被商經局嘅常務秘書長利敏貞洗晒版！事關佢噚日出席記者會所著嘅嗰件迎春「鳳袍」，簡直係震驚13億人民！有網民仲用佢同慈禧太后仲有胖虎（技安）相比！咁震撼嘅視覺衝擊，搞到噚日坐佢旁邊嘅老細、商經局局長邱騰華頓時變咗隱形人！Jenny估佢哋講過咩大家亦已經完全冇印象了吧？

Jenny笑到收唔到聲啊!!(設計圖片)

誰能及我驚天動地……

　　不過邱局長好大方嘅，今日去鄉議局新春團拜嗰陣仲向行家們大讚利常秘件衫「恰如其分」、「好有Fashion Sense」，仲話「有Selling Point之餘，講嘢又有Point」！老細果然好照啲細噃！不過叫局長親自試吓著傳統服飾開記招，佢就好似有啲想嗌「唔好」咁喇！計Jenny話利常秘今次嘅「Fashion Sense」，直頭可以名留Fashion史啦！

常秘常秘 件衫Designer好神秘

　　至於副局陳百里又點睇呢？Jenny同讀者真係好想知利常秘呢件「鳳袍」出自邊位名師手筆啊！副局可否解答吓？不過陳副局就一直顧左右而言他，一時就同Jenny講「我哋講吓迪士尼個利潤計算喇！」、「不如傾吓一帶一路呀！」就係唔肯透露利常秘件衫的秘密，睇嚟Fashion嘅嘢，陳副局同Jenny一樣都係「識條鐵」咩！