因乜解究林鄭話「女人心海底針」？

　　好多男人成日都話「女人心海底針」，形容女仔嘅諗法難以觸摸，但係呢句說話由一位女性講出，仲要係全香港最高地位嘅女性，又何解呢？

「女人心海底針」，要摸到枝「針」有副靚眼鏡似乎係唔夠!

林鄭講嘢意味深過海底針

　　是咁的，今日特首林鄭月娥就去咗一個活動，因為佢上年都有嚟過呢個活動，佢致辭嗰陣就提返上年嘅講詞，話上年講嘅「擔心、痛心、灰心」，原來都唔係真嘅，其實嗰陣佢好開心o架，因為嗰陣「唔使我做」，做咩？咪就係做特首囉！所以Jenny幾時都話政治一日都嫌長，轉眼一年林鄭已經為香港首位女特首。

　　佢仲用「女人心海底針」嚟形容自己添！話今日真係用特首身份重返現場，反而個心情就係沉重，因為要由佢自己親自帶領香港行入新願景喎！嗱！「女人心海底針」應該就唔似得立法會辯論緊嘅「一地兩檢」咁有爭議嘅，之但係由林鄴自己親口講呢句，Jenny硬係覺得奇奇怪怪咁。再加上佢上年仲主動話：「先此聲明，我跟著嘅呢廿幾分鐘演講並唔係選舉行政長官嘅競選綱領。大家可以視之為一位服務咗公眾、社會36年嘅官員嘅肺腑之言」，仲話唔介意大家視之為呢位官員嘅「臨別贈言」添！去到今日，佢做到特首，但係又「心情沉重」，呢句說話嘅意味真係深過海底針呀！連作為女人嘅Jenny都參唔透！

鄺神：有一種愛情叫「陳帆」

　　話說官員去晒活動Sell政策，議員就留咗喺議會繼續開會，去到中午先終於入到戲肉，傾「一地兩檢」嘅無約束力議案。「逗號」男神鄺俊宇發言嘅時候，就發揮佢嘅「MK愛情文學」功力，幫運輸及房屋局局長陳帆日前嗰句「揀選了終身伴侶唔等於要放棄其他選擇」改咗個書名，叫「有一種愛情，叫陳帆」，Jenny聽到都忍唔住笑出聲，唔通呢個將會係鄺神下年書展嘅主打？話說鄺神啲大作又真係冇試過用政治做題材噃！搵次試吓講議會愛情、政治愛情，呢個題材都幾新穎吖！