Judy宣布參選口窒窒 未熟書要再train下

 　　立法會補選聽日起就接受提名，Jenny上星期同大家講過吓噚日星期日係民主派初選嘅日子，今日結果出咗喇！講真都係意料之內，九龍西嘅勝出者係姚松炎，而新界東就由范國威(咖哩飯)跑出，佢哋兩個會代表民主派出戰。而港島區嗰邊，人稱「學民女神」嘅周庭就喺上星期六就正式宣布咗話會參選，今日新民黨嘅陳家珮（Judy）都正式表態喇！

陳家珮（Judy）正式表態去馬港島區補選，至於佢的答問技巧就真係最好搵人 train train喇！

葉太畀位上 Judy勁緊張

　　今日Judy同葉太齊齊著紅色外套，不過葉太就著暗紅色，Judy著鮮紅色，畀返個fo主角吖嘛！唔只衣著上面尊登畀Judy做焦點，連答問題都係㗎喎！葉太好明顯想訓練Judy嘅答問技巧，今日記者會差唔多全程都交畀佢自由發揮。不過Jenny就覺得Judy好似未train up咁，表現差咗啲咁噃！

　　事關佢開場白都尚算順暢，不過一去到提問環節，Judy就勁緊張咁款，有行家問佢係唔係打算接葉太捧先出嚟選，佢就口窒窒咁答：「今...今次我出嚟參與今次補選呢...係絕對有信心，所以好希望可以勝出，多謝」全場聽完之後都「黑人問號」咗!

想同泛民坐隔離位 有冇問過葉太先?

　　唯有追問多次，Judy先如夢初醒：「我諗我哋...我哋眼前最重要都係3月11號呢個...」第一條問題就答得咁緊張，睇嚟Judy仲有排練啦！

　　嗱!今次Judy嘅競選口號係「捍衛法治，回歸理性」。只不過，Jenny印象中Judy唔係法律界人士，點實踐個口號先？Judy竟然講咗去佔中時期啲南區居民返唔到工......咁即係會點做呢？Judy就話，如果佢贏咗個選舉，佢就會喺議會入面坐喺羅冠聰個位，即係一堆泛民議員嘅中間，就會爭取同議會嘅年輕人溝通，說服佢哋支持基本法喎！

　　Judy呀！立法會嘅座位分配係政黨之間自己協調㗎喎，你想坐喺泛民中間，有冇好似容海恩咁「問過葉太先」？再者，議會入面30歲以下嘅年輕人，都已經被政府DQ晒，除非係你嘅對手周庭贏咗啦，如果唔係都好難喺議會見到年輕人喇！但佢贏咗即係你入唔到議會噃......