鄭若驊於答問大會遭全面狙擊 波叔變身護花使者

　　今日係特首林鄭月娥將答問大會每月恒常化之後，首次去立法會嘅大日子，理應主角就係林鄭本人嘅，只不過呢排新任律政司司長鄭若驊嘅僭建風波佔盡各大頭版，雖然Jenny同其他行家一樣都好忙好多嘢做，但都冇忘記是日目標係列席嘅鄭司長！

今日個fo完全去晒捲入僭建風波嘅鄭司長身上，佢離開立會嗰陣行家們當然狂追不捨。

鄺神開出第一炮

　　記者滿腦問題，一班民主派議員又何嘗唔係？當然都有好多野想問鄭司長喇！喺林鄭講完佢8分鐘嘅開場白之後，民主黨嘅涂謹申就不滿佢篇開場白隻字不提司長僭建一事。可惜吖！爭㩒掣嘅環節，民主派就稍微落後建制派，民主派第一個發言嘅就係民主黨嘅鄺俊宇（鄺神）！

　　鄺神一嚟就直接同林鄭講：「今日鄭若驊先係主角」，要求鄭司長親自嚟到立法會回應事件。林鄭又豈是省油的燈，回應亦都火藥味濃，話點解冇喺開場白提及涂謹申講嘅問題？就係因為一早預咗有人會問。

林鄭自揭准鄭若驊「秘撈」引爆新炸彈？

　　林鄭順道澄清有傳言話鄭司長大半年前就早知會做律政司嘅講法「唔係事實」，不過林鄭就話「囈」咗鄭司長幾多次就唔好提喇！（林鄭低聲下氣求人絕對是千金難買的Moment！）只可以話個時間好短，仲大爆短到佢要特別批准鄭司長接任後可以繼續處理埋手頭上嘅6單仲裁案件。

　　林鄭仲話「畀著我都承受唔到啦！又要安置公事又私事……」咪住先！咁咪即係律政司司長都「秘撈」？睇來呢個又係一個新嘅「政治炸彈」啦！

　　不過，顯然大家都冇預計過咁快就出現另一個炸彈，所以當司長離開嘅時候，大家嘅焦點仍然係喺司長嘅地牢，所以當佢離開立法會嘅時候，大批行家追住佢，要求佢就事情嘅最新發展交代，不過司長一於封口，繼續十問九唔應，全程耷低頭直行。而身旁記者加攝影師亦繼續砰砰嘭嘭，將佢團團圍住，場面有幾混亂，真係唔係你估！

波叔護花衝出重圍

　　 嗱！身邊嘅財政司司長陳茂波（波叔）同埋保安局局長李家超就真係唔話得，瞓身做「護花使者」，一路護送住佢返到政府總部添！

　　去到下晝嘅時候，各位議員先好似如夢初醒，發現「秘撈」呢個新「政治炸彈」。民主派就梗係唔會放過佢啦！紛紛指責司長可能涉及利益衝突；而建制派就話仲裁案要處理好耐，唔通等佢處理完先至委任咩！照Jenny睇，司長雖然噚日先出嚟見完記者，睇怕短時間內又要再見第4次啦！Jenny奉勸司長今次唔好再擠牙膏式回應喇！要知道記者係可以好神通廣大㗎……