梁天琦退本民前、青政無暇戰補選 本土派進退失據

　　上個星期就過咗建制同泛民嘅《議事規則》大戰，Jenny以為今個星期會回復平靜，點知先啱啱星期一，又有事情發生喇！不過今次嘅主角就唔係建制，亦都唔係泛民，而係沉寂一時嘅本土派。

以梁天琦為主角的紀錄片《地厚天高》。(官方fb圖片)

ICON梁天琦唔玩 本民前仲彈唔彈得返起？

　　話說今日Jenny一起身，就見到有新聞話本土民主前線（本民前）嘅發言人梁天琦辭咗黨籍同埋發言人嘅職務。咁大件事？Jenny都要即刻上佢哋嘅Facebook睇睇先！

　　本民前話梁天琦係因為就快要面對上年年初二旺角騷亂嘅審訊，都預佢要審好長時間，想「在餘下數月陪伴至親」，所以先唔Do，本民前都有挽留但係唔成功。咁大決心，唔通梁天琦都對今次單官司冇咩希望？不過梁天琦請辭之後，本土前比較出名嘅就淨返黃台仰，但黃生又棄咗保，而家唔知去咗邊，Jenny諗緊本民前會唔會從此就沉底呢？

青政官司纏身 派唔到人去補選

　　講起官司，本土派除咗梁天琦佢哋之外，仲有青年新政（青政）都面對緊另一單案件，就係梁頌恆同游蕙禎被立法會裁定宣誓無效，佢哋之後同3個議員助理同埋義工闖入立法會議事廳，用喇叭企圖自行宣誓，咁就被人告參與非法集結。呢單案今日就喺九龍城裁判法院開審，佢哋否認控罪，個官就押後到聽朝(19日)先再審。

　　咁梁游兩個離開法院個陣，有行家就問佢哋冇參加民主派初選，係咪不滿佢哋個機制，所以自行派人出選？游蕙禎就同記者講，而家佢哋兩個都忙於處理法庭案件，無心機去理補選喇。梁頌恆都補充話，只要參加者甚或當選者會為抗爭者做事，青政都唔會反對喎。

「泛民建制本土三分天下」不復再？

　　其實Jenny Feel到，自從梁游喺DQ案終極敗訴之後，無論係議會內定議會外，本土派好似沉寂咗落嚟咁。跟住Jenny下晝又收到風，之前Join咗泛民個初選、前學民思潮成員張秀賢話，自己今次係有本民前同埋青政嘅支持。不過Jenny 都覺得張秀賢同呢兩個本土黨派仲係有好大差別，而張秀賢亦都講明自己唔係支持港獨，咁睇嚟梁天琦講過嘅「泛民建制本土三分天下」，似乎又變返做二元對立。