志偉成語動畫廊 一句辣著謝阿Paul

　　近排Jenny都見謝偉俊（阿Paul）比較躁，唔知係唔係做得議事規則委員會主席做耐咗，呢排又因為改《議事規則》成為咗眾矢之的，所以差唔多日日都見到阿Paul同民主派輪流開火，嗱！今日一大朝早又有嘢睇喇！

晨早起來心情躁

　　是咁的，因為上次主席決定咗要加4日會，咁開完噚日朝11晚8嘅大會之後，各位議員今日開始，除咗星期日之外都要返朝9晚8。唔知係咪今日第一日開始呢個「大長征」，大家都未瞓醒所以躁躁地，結果啱啱開咗半個鐘，民主黨嘅主席胡志偉就講咗句『狡兔死，走狗烹』嚟形容而家嘅情況，話建制派趁有6個非建制派議員被DQ，就急急腳去改《議事規則》，將非建制派同建制派比喻為「狡兔」同「走狗」。

兔死狗烹典出《史記》

　　呢句「狡兔死，走狗烹」即係成語「兔死狗烹」嘅出處！就等Jenny就同大家講講呢個出自《史記》嘅典故啦！話就說好耐好耐之前嘅戰國時期，越王勾踐大夫范蠡幫越國打敗吳國之後自行引退，仲託人畀封信以前嘅同事文種，勸佢學自己咁歸隱，以免招惹災禍。原來范蠡一早就知越王係個「只能共患難，不能共富貴」嘅人，但又冇理由講到咁白去鬧一國之君，想死咩？所以佢喺信中就話﹕「飛鳥盡，良弓藏，狡兔死，走狗烹」，勸文種都學佢咁捨棄功名富貴，一於保住命仔咁話。

　　本來就咁一個比喻都冇咩特別，誰知志偉就特別點名被人戲稱「西環契仔」嘅阿Paul，話「謝偉俊你作為『走狗』嘅一部分，點可能唔會喺將來受到中央政府唾棄呢？」就係呢一句，又再次撻著咗阿Paul，大鬧「我可以忍一次，可以忍兩次，我唔可以忍第三次！」質問志偉「咩叫走狗啊！？」要佢收回言論同埋道歉，志偉都一樣企硬。兩邊撐到咁行，主席梁君彥都冇辦法，唯有暫停會議睇錄影帶。一停就停咗差唔多半個鐘，返嚟之後志偉就話肯收返指明阿Paul嘅言論，淨係留返句「狡兔死，走狗烹」形容而家嘅情況喎。

尹兆堅話原來係戥建制派唔抵？

　　雖然場鬧劇早開始亦都好早散，不過餘波一直延續到下晝。尹兆堅下晝發言時，就籍機為黨友抱不平，覺得其實志偉唔需要收回言論嘅，因為明明呢個成語嘅意思本身係存有褒義，係講緊作為「良弓」、「走狗」嘅功臣，為國家付出咁大功勞，最後竟然冇啲回饋，係戥佢哋唔抵，唔明點解咁多同事做咩咁大反應。Jenny仲見有網民就試吓代入返落典故嘅情景，想像吓當范蠡同文種講：「飛鳥盡，良弓藏；狡兔死，走狗烹。」文種竟然回應一句：「你做乜鬧我！？」都咪話唔好笑㗎！