如何記住「憲法」？一於「染紅」日曆多日假！

　　12月4日係一個大日子！咩大日子？唔係小妹生日！係「國家憲法日」呀！Jenny細細個已經去唔少《基本法》嘅講座，知道《基本法》對香港來講好重要。但係原來今時今日淨係講《基本法》係唔夠㗎，要拉埋《憲法》一齊講先夠Update！

「國家憲法日」座談會今年第一次搞，中聯辦法律部部長王振民、前律政司梁愛詩、政務司司長張建宗齊齊出席支持！

《基本法》突然變配角

　　話說，早在2014年中國人大已將12月4日定為「國家憲法日」。香港就今年第一次趁呢個日子搞咗個國家憲法嘅座談會，順來賀一賀憲法公佈施行35周年。咁高興，點可以少左Jenny嗰份呢？中聯辦法律部部長王振民有出席㗎，佢話推廣《憲法》對於香港人嚟講比較新，因為以往廿年都係推廣《基本法》。

　　不過見今日政府官員、中聯辦都齊齊出嚟高呼「推廣《憲法》」，而之前日日提住嘅《基本法》就冇乜點提，變咗配角嚕！正當咁多位嘉賓都喺度講《憲法》同《基本法》如何密不可分、息息相關、對香港嘅影響如何深遠之時，王部長就講咗一樣非常「貼地」嘅嘢！

乜嘢「染紅」最令人期待？日曆囉！

　　可能大家都記得Jenny都講過好多次，小妹法律知識有限，所以一輪「法」來「法」去之後，就覺得咩都係假，同Jenny呢啲香港打工仔講最貼身、最上心嘅，就梗係講放假啦！似乎王部長都聽到Jenny嘅心聲啦！佢就同同場嘅張建宗司長提議，不如整返個「國家憲法日」，即係12月4日做法定假期啦！如果係真嘅，Jenny梗係第一個舉腳贊成！

　　王部長席間講過中國係紅色嘅，所以香港喺回歸之後，政治版圖上梗係毫無疑問地係紅色中國嘅一部分，所以冇咩「染紅」、「不染紅」嘅講法。計Jenny話，應該唔少香港人覺得其他所有嘢「紅」唔「紅」都唔緊要，最緊要係日曆嗰一格要「紅」！要港人記住「憲法」其實唔難啊！