麥美娟生日袁國強請食燒肉？真相係……

　　每個人都有生日，有啲公司仲會有生日假畀員工放，不過立法會議員就冇呢支歌仔唱喇！如果生日撞正立法會大會，到底係好事定壞事呢？

Alice決定動用佢寶貴嘅生日願望，唔求覓得如意郎君，但求立法會盡快通過「一地兩檢」無約束力議案！

唔要男人要「一地兩檢」

　　今日係工聯會立法會議員麥美娟Alice嘅生日，正正就撞咗立法會大會，仲要討論政府提交嘅「一地兩檢」呢個咁有爭議性嘅議案，Alice決定動用佢寶貴嘅生日願望，唔求覓得如意郎君，但求立法會盡快通過「一地兩檢」無約束力議案咁話！

　　Alice同Jenny講，今日喺立法會同工聯會嘅朋友一齊慶祝咗生日，佢哋除咗買咗生日蛋糕同佢慶祝，仲送咗紮花俾佢添！Jenny留意到佢今日着咗一條藍白色花紋嘅連身裙，同平日Style有啲唔同！有行家同Jenny講，覺得條裙好似中國傳統青花瓷啲花紋，不過Alice就話冇特登打扮過喎！

袁國強請食燒肉賀一賀？

　　Alice有蛋糕食，Jenny同一眾行家就有燒肉食，事關今日律政司司長袁國強嚟到立法會請大家食燒肉，Jenny當然即刻八下因咩事咁高興，司長嘅IO就同Jenny講，其實冇咩特別，平日間唔時都會請大家食嘢！但係下午茶時間請食燒肉咁有趣？IO姐姐就話：「唔係～只不過係轉吓口味啫！」Jenny就覺得，唔通係因為司長都估今日會通過「一地兩檢」無約束力議案，所以同大家慶祝定？定係政府成日話要改善行政立法關係，今日又適逢Alice牛一，司長其實係想順道賀一賀佢？咩原因都好，正所謂：「有食唔食，罪大惡極！」，Jenny當然都有好好品嚐「司長牌」燒肉啦！

今日下午茶有「司長牌」燒肉食。

胡志偉生日撞正大會「拉布」

　　其實議員生日撞正開大會都唔係第一次嘅事，民主黨主席胡志偉今年嘅生日仲撞正立法會喺《施政報告》後嘅第一次大會添！嗰日民主派議員要全情投入「拉布」，一方面為咗抗議政府抽調議程，另一方面就反對建制派又趁住泛民人少又提出修改《議事規則》，淨係聽敲鐘都聽到頭暈暈，志偉呢個生日都算特別喇！不過一眾民主黨成員都有同佢慶祝生日，又買生日蛋糕請佢食。有時生日冇假放，仲撞正開大會，其實都可以幾Warm吖！