《施政報告》前出「百日報告」林鄭有咩未做？

　　聽日特首林鄭月娥就公布佢任內第一份《施政報告》，Jenny數數手指，唔經唔覺，原來新政府上場都有100日喇！林鄭一上場就強調要有「新思維、新風格」，所以佢喺公布《施政報告》之前都搞搞新意思，實行先來一個「百日報告」，噚日就喺Facebook上載咗條片，畀大家睇返佢呢100日去咗邊、做咗乜，再加埋一份羅列咗工作嘅文件，雖然分開兩個平台刊出，打埋算盤，你都可以話算係圖文並茂嘅。

林鄭今日率先公布《施政報告》.....嘅封面。

上場100日見傳媒200幾次

　　之不過呢條「百日報告」片只得1分03秒，冇旁白淨係用啲相加條背景音樂剪輯而成，Jenny就覺得悶咗啲，再加上半秒轉換一張相，睇到有啲眼花花。不過，唔緊要！林鄭今朝見傳媒嗰時專登提一提呢份「百日報告」，話行政長官辦公室網頁已經上載咗喇，列出晒新政府上場100日嘅工作進展。

　　Jenny當然即刻去望下啦，當中寫晒政府做咗嘅同進行中嘅工作，都有成70幾項咁多㗎！當中提到特首同咁多位司局長進行咗逾50次嘅地區探訪同埋同區議員座談，又同傳媒會面超過200次，即係平均一日見至少兩次！對部分行家來講，可能見林鄭嘅次數仲多過見情人呢～（前題係如果有的話！）

　　至於完成咗嘅工作，政府就話已經搞掂兩級制利得稅的實施方案、「低津」嘅檢討，聽日嘅《施政報告》度就會再講多啲喎！嗱！為咗方便大家，Jenny已經準備好「百日報告」嘅網址喇！http://www.ceo.gov.hk/chi/pdf/100days.pdf有興趣嘅讀者可以去睇吓啊！

睇文件最好就配埋段片。

《施政報告》會唔會走數？

　　雖然呢份「百日報告」將政府啲工作嚟個「大晒冷」，不過Jenny發現仍然有好多民間一直好「恨」有嘅嘢並未包括喺入面嘅，例如泛民講咗好耐嘅全民退休保障啦、標準工時啦，仲有泛民同建制兩邊都好關注嘅領展問題等，所以有唔少團體就趁聽日《施政報告》出爐之前示威、請願，希望林鄭唔好再迴避喎！

　　Jenny諗返起，今次份《施政報告》發表前，又真係冇呢幾方面嘅風聲漏出，林鄭究竟會點處理呢啲難題呢？咁就要由聽日嘅《施政報告》揭盅喇！

唔知林鄭點回應領展問題呢?