踢走藍色星期一　靜待《施政報告》「打仗」日

　　星期一係Blue Monday就係打工仔都知嘅，Jenny都啱啱過完個悠長假期，今日再返工都覺得Blue Blue地。仲要一望個月曆，見到下個紅日竟然同星期六撞咗，仲要冇補假！下個紅日就要等到遙遠的聖誕，諗諗吓，係唔係同Jenny一樣，即刻由Light Blue變成Deep Blue呢……

笑吓啦！香港人！

不論黃藍陣營　逾半港人周一最Blue

　　Blue Monday應該都係全香港人嘅通病，事關就有個「今日笑左未 ?」嘅調查發布會，正正就係講呢個「通病」嘅調查結果喎！不過其實Jenny就咁聽個發佈會嘅名都覺得好得意，原來個調查都幾有趣！個調查話，有52%嘅受訪者話覺得星期一係「最不快樂」，有見及此，主辦機構話會就今次結果，搞返個「醒神星期一」活動，同各界一齊令「藍色星期一」唔再「藍色」，Cheer Up一下大家咁話喎！不過Jenny就覺得，星期一之所以咁Blue，都係因為要面對跟住落嚟成個星期咁多嘅工作量，返工仲要參加埋活動咪仲攰？計Jenny話，個活動最好就係畀大家中午睡一睡，又或者幫大家減輕吓工作量，咁就最「醒神」喇！

自處有道 希望在明天

　　個調查話，有六成香港人話過去一年整體嚟講都算覺得開心，比起上年大幅上升咗差唔多四成，認為香港人係「自處有道」嘅；而且有七成人相信「希望在明天」，覺得未來個半年會開心啲喎！主辦機構嘅顧問團成員司徒永富就話，香港人有種「獅子山下精神」，會逆流而上，面對社會各種議題都敢於表達。佢仲話，如果掌權人士可以好好善用呢啲聲音，將會係一種「正能量」噃！司徒生嘅意思，係唔係即係叫新一屆政府要聽吓市民意見呢？嗱!過兩日就係特首林鄭公布佢任內首份《施政報告》，估計有唔少利民措施，希望大家都有份受惠啦！不過Jenny同一眾行家，不過有冇份受惠都好，都已經要準備發表報告當日「打仗」喇，唔可以Blue太耐，，入定一、兩打Red Bull可能仲實際！