一地兩檢個個都「關注」 唔通個個都想關注咩？

　　睇返呢幾日嘅新聞，睇嚟近排最hit嘅議題，應該非「一地兩檢」莫屬喇！事關方案公布咗半個月，咁大爭議性嘅嘢自然keep住日日有新聞，政府同非建制亦日日有嘢講。政府出嚟解畫，非建制即刻「柴台」，Jenny睇住雙方兵來劍往，真係大開眼界，不過小妹都大約估到結果會點。

　　建制派喺呢個咁重要嘅議題上面，當然要克盡己任出力「護航」啦！所以作為林鄭就施政報告第一個見嘅政黨--經民聯，佢就叫咗佢哋嘅青年事務委員會整返個「一地兩檢關注聯盟」，同非建制派嘅「一地兩檢關注組」抗衡、抗衡一下，話要畀啲支持聲音畀政府喎！

正如阿嬌話齋：「個個都拍拖，唔通個個都想拍拖咩?」，而家個個都係「關注」，我諗好多人都聽到頭暈暈。

認實「嘜頭」咪搞錯

　　驟眼一睇，「一地兩檢關注組」同「一地兩檢關注聯盟」，兩個名似到呢！Jenny真係即刻諗起某啲廣告:「提防影射，請認明XX商標……」！唔知係唔係一眾行家都有同樣疑惑，所以問晒兩邊發言人驚唔驚市民撈亂兩個名呀？率先成立、屬於泛民嗰邊嘅「關注組」就話真係有啲擔心，而由建制經民聯牽頭嘅「關注聯盟」就話未驚過，同Jenny講大家代表嘅群眾唔同，應該唔會混淆喎！Jenny就覺得，如果擔心市會攪亂兩邊，不如先認吓兩邊成員個「嘜頭」咪得囉！

　　咁到底兩邊有啲咩人呢？較先成立嘅「一地兩檢關注組」係由非建制派組成嘅，暫時就包含咗94個議員、學者、專業人士及民間團體，臨時聯絡人係公民黨立法會議員陳淑莊(呢個易認！)；至於「一地兩檢關注聯盟」呢……資料話發言人係經民聯青年事務委員會主席梁宏正，暫時有22個團體加入咗。

一地兩檢關注聯盟今日開記招，中間個哥哥仔係咪有啲熟口面呢？

「關注聯盟」生面口 原來發言人大有來頭

　　咦？！呢位梁生硬係好熟口面咁噃！不過，對一般大眾來講真係生面口咗少少，Jenny都要諗一諗呢位梁生係邊個，結果實在諗唔起，就即刻上網查吓佢家宅先！原來佢就係立法會主席梁君彥個囝囝！睇嚟梁主席已經為囝囝鋪好從政之路，第時就可以幫爹地手喇！

　　睇返個聯盟，好多仲係名不經傳嘅青年事務委員會成員、區議員等等，Jenny同行家們都要齊齊玩認人遊戲，互相提點吓以免撈亂。似乎成員們都清楚自己知名度唔高，難怪派卡片嗰陣仲踴躍過記者啦！不過唔使驚！正如Jenny話齋，只要泊個好碼頭，日後唔使愁！既然都入到經民聯，乖乖地喺到做幾年，努力做到好成績出嚟，之後喺選舉時又蒲吓頭，話唔定下屆政助就係你哋呢！到時風水輪流轉，唔好唔記得小妹啊！