我們不需要21世紀的72家房客

　　今日繼續講吓香港嘅土地同房屋問題。嗱！講起樓，Jenny就嬲！以前「七十二家房客」係本港70年代經典電影，有濃濃香港情懷，好多人講起鄰里關係就會拎出嚟懷緬下。之不過，懷緬還懷緬，潮流雖則興復古，但其實香港真係唔需要、亦唔應該走回頭路。

劏戶是高樓價的畸型產物

　　運輸及房屋局局長陳帆（梵哥）星期日（9日）去探完深水埗嘅劏房家庭後，提出「同屋共住」概念，最初佢話想由政府主導幫社福機構以成本價出租合規格嘅劏房畀基層；呢個「官劏」計劃，其實係參考咗社福機構嘅「光房計劃」，搵「良心包租公」以「成本價」出租，幫助有需要的基層市民。嗰時好多人，包括Jenny都覺得劏房雖小，但租金低過市價，基層唔駛再畀租魔逼遷，解決燃眉之急，都好過冇啦！

　　點知事隔幾日梵哥竟然反口，話政府主導嘅劏房租金會與市價相若，100呎嘅房仔，租金盛惠4000大元，完全唔係「光房計劃」嗰回事噃！Jenny嗰個畀業主加租逼遷過嘅朋友仔一聽，即刻就話：如果同市價一樣，咁我使乜搵你政府呀？梵哥仲有諗過用眾籌嘅方法籌旗添！局長真係有創意又跟得上潮流喇！

　　今次梵哥真係「新官上任三把火」嚕，可惜係就係「火水」個「火」。梵哥話，概念參考咗「七十二家房客」做法，相信可以增加不同租戶之間嘅互動機會，等大家能夠促進關係，識吓Friend子。之但係，大家細心諗下吖，劏房其實係香港樓價高企下嘅畸型產物，如今走回頭路返去70年代仍未變成國際都市嘅香港咁樣，其實係好可悲嘅一件事。

土地同良心包租公同樣難搵

　　100呎嘅房真係連一個車位都不如，一個人住都覺侷促，如果仲要住一家人，Jenny擔保梵哥你會見一次喊一次！梵哥強調唔係想取代公屋，梗係取代唔到啦，公屋3000蚊租已經有400呎喇！你話土地難搵定良心包租公難搵？Jenny就覺得兩樣都咁難搵。

　　當Jenny好勞氣咁同工黨嘅張超雄（阿Fer）呻嘅時候，佢就話明白政府原意係好嘅，希望可以作為過渡性房屋措施，但佢都對以市價或者貼近市價出租百呎房間感到懷疑。

　　阿Fer話，「光房」成功同幫到基層係因為租平，而且有社福機構硬件之外嘅支援。佢覺得良心業主唔係冇，只係真心難搵，同時亦覺得政府要有足夠誘因先可以引到班業主個「良心」出來。與其等業主嘅「良心」，不如正如阿Fer所講，試下改裝空置校舍，政府空置物業租畀基層，令佢哋住得好少少啦！

　　Jenny就心諗，如果同市場無分別，政府一齊搞劏房，係唔係畀緊信號啲業主同地產商聽，政府都好支持佢哋發揮創意，玩埋「量子力學、空間折疊」，將啲單位逐啲變細又得，立刻變細又得，得咗！咁又何苦呢？