話說早幾日香港舉行「亞洲比特幣大會2025」，呢場大會真係星光熠熠，因為圈內所有大佬們都幾乎出席，其中包括Adam Back（Blockstream）、趙長鵬（幣安）、Eric Trump（特朗普集團）等行業領袖，真係不得之了。

　　不過呢次大會有單搞笑嘢，就係有本地英文媒體報導，有香港一名官員、一名立法會議員退出呢次會議，主要係因為「被建議」唔好與美國總統特朗普個二仔Eric Trump有互動。其實要「政治正確」係完全明白，畢竟中美關係都仲未搞返好，如果香港官員同侵侵仔有握手、互動，分分鐘連工都無得做（你真係唔知媒體點樣發大去做）。

　　但政府係咪真係無嘢做到呢？事實上，呢一轉「亞洲比特幣大會2025」係香港搞，證明左香港係加密貨幣市場嘅重要性，因為大家都知道香港係亞洲比特幣主要交易場，其他好似例如新加坡、韓國、日本都追唔上香港。

　　香港政府剛剛先出左「穩定幣」法案，其實應該要隆重其事，可以揀啲唔同侵侵仔同場出現，搵官員走去同趙長鵬握下手，影下相，宣揚下香港穩定幣，睇下幣安內頁會唔會有機會開返個港幣穩定幣C2C網上商鋪，發揮下香港係加密貨幣影響力。

　　咁大壇龍鳳，香港官方無人出席，喂，好肉酸又好小家囉。

《編者按》本欄搜羅即市傳聞，惟消息未經證實，《經濟通》亦不保證內容之準確性。

撐運動．護關節 | 維柏健健骨鐵三角【關節健骨至尊(升級版)】激筍買1送1 (原價$388)！同時修復、抗蝕、強骨，7天見效。立即把握健骨良機！(優惠期至18/9/2025)► 了解詳情